KHAWTHLIR

Mizoram chief secretary atana ruat thar Lalnunmawia Chuaungo, IAS chuan nimin aṭang khan Chief Secretary hna a zawm ṭan. Lalnunmawia hian chief secretary kalchhuak Arvind Ray a thlak a, ani hi Delhi-ah a awm dawn a ni.

Mizoram Merchant Association (MIMA) hruaitute chuan, nimin khan chief minister Zoramthanga chu CM Bangla-ah an kawm a; Goods and Service Tax leh Inner Line Permit an sawipui. Chief Minister chuan ILP chu a ngaih pawimawh thu leh khauh taka kenkawh ṭha a tih thu MIMA hruaitute a lo hrilh niin MIMA thuchhuah chuan a tarlang. MIMA chuan, khauh lehzuala ILP kalpui an duh thu leh ILP cell/board pawh din ni se ṭha an tih thu CM an hrilh tih an sawi bawk.

Serchhip DC Sangchin Chinzah chuan thupek chhuahin, meilam ṭha tâwk sial hmasa loa lo/huan leh leipui hâl khap a nih thu a puang. Mihring nunna leh bungrua tana hlauhawm tura kângmei tihchhuah te, eirawngbawlna leh ran chaw chhumna leh thuk leh meihawl, khawnvartui, gas, electric thukte kângmei tichhuak thei zawnga hman khap a nih thu a tarlang bawk.

Minister Lalruatkima, Aizawl West-II bialtu chuan nimin zing khan a bial chhung, Joint YMA Field, Vaivakawn bula Aizawl West Joint YMA Multipurpose Sports Complex sak mek a tlawh a, hmalaknate a enfiah. Lalruatkima hi Sports minister Robert Romawia Royte-in a ṭawiawm a ni.

Champhai District Krishi Vigyan Kendra (KVK), Khawzawl leh NABARD, Champhai district bultumin KVK Farmers Training Hall, Khawzawlah nimin aṭang khan Khawzawl RD Block huam chhunga self help group (SHG) thlan bik pasarihte tan pa (mushroom) khawi leh changpât leiṭha (vermi compose) siam dan zirna buatsaih a ni a; SHG member ṭhahnem tak an tel.