Mizoram State Day lawm a ni

Governor chuan, Mizoram mipuite State Day chibai a bûk a, "He ni pawimawh takah hian Mizoram chu kawng engkima state hmasawn tak ni turin duhsakna ka hlan. Ram zalên tur chuan ram inrêlbàwlna lama zalenna mai a tâwk lo a, ei leh bàr, economy lama zalenna, mi danga innghat loa awm theih leh khawtlang nuna zalenna a keng tel tur a ni. Chuvangin, intodelh a pawimawh hle," a ti.

Sorkar laipui pawhin into­delhna kawngah hma a lâk thu sawiin Larsap chuan, "State tinte theihtawp chhuah turin a duh. Mizoram hi a chhunga chêngte mi ṭha, dan leh thupek ngai pawimawh mi, inthunun thei tak an nih avanga hmasawnna kawngah pawh puitu ṭha tak a ni. Hetih rual hian, hriselna kawngah hmalak a la ngai," a ti a, state tan theihtawp chhuah turin mi tin a sáwm. 

Chief minister Zoramthanga pawhin thu sawiin, state inrêl­bàwlna puitling nei thei tura harsatna tam tak paltlang a, nunna hial chánte an awm tawhzia hre reng chungin State Day hlutna mipuiin an hriat chian thar leh a pawimawh thu a sawi a, "Mizoram hi state ṭhang duang, hausa leh entawn tlaka siam hi kan mawh a ni," a ti a, intodelh chu hmabak lian ber a nih thu a sawi. 

Zoramthanga chuan, state hausaknate chu hmang ṭangkai a, remhriatna nen theihtawp chhuah turin mipui a sáwm a, "Sorkar chauha innghat lo a, kohhran, tlawmngai pawl leh mipui thawhhona ṭha kan nei zel hi a lawmawm hle a ni," a ti.

State Day lawmna inkhawm hi chief secretary Lalnunmawia Chuaungo-in a kaihruai a, NGO Coordination Committee aiawhin chairman Vanlalruata'n thu a sawi. Deputy Chief Minister, Assembly Speaker, Govt. Deputy Chief Whip, Deputy Speaker, minister, MLA leh sorkar official-te an tel a ni. 

Mizoram chu union territory dinhmun aṭangin February 20, 1987 khan state dinhmunah hlan kai a ni a; India rama state 23-na a ni. State a nih tirhin district pathum a awm a, tunah chuan district 11 a awm tawh.

Mizoram state zau zawng chu square km. 21,087 a ni a; kum 2011 chhiarpuia tarlan dan chuan, Mizoram state mipui zat chu 10,91,014 a ni.