KHAWTHLIR

Mizoram Judicial Service Association (MJSA) chuan February 19, 2021 khan online hmangin kum 2021-2022 chhunga an pawl hruaitu tur an thlang a; president atan Liansangzuala, vice president atan Dr HTC Lalrinchhana, general secretary atan Thomas Lalrammawia, joint secretary atan Lalngaihmawia Zote, treasurer atan Lalhriatpuii leh financial secretary atan Cacy Malsawmtluangi Ralte te an thlang.

February 12, 2021 aṭanga chin hriat loha awm Zoramsangi (42) w/o Auringa chu Inrinni khan a bona aṭanga km. 4 vela hla ramhnuaiah thia hmuh a ni a, Inrinni zan khan vui nghal a ni. Zoramsangi hian Biate aṭanga Sialhawk thlen hmaah pawisa a phûm nia sawiin, la turin naupang pahnih nen an kal a, pawisa la tura ramhnuai a pan hnuah hmuh zui a ni lo. Khawtlang huapa zawn hnatlang February 19-a tihtawp tûk, February 20-ah hmuh a ni ta a ni.

ZMC laboratory chu nimin khan khâr a ni a, RT-PCR hmanga swab sample endik a awm lo. Vawiinah swab sample endik chhunzawm leh a ni ang.

Laldinpuia (18) s/o R Chalthangmawia, Mualpui, Salem Veng, Aizawl chu February 20, Inrinni tlai khan Muallungthu rama Tuirial luiah a tla hlum. Thu dawn danin, Laldinpuia te hi an chhungkuain Tuirialah an kal a, tlai lamah a naute pahnih tuiah an tla a, chhan a tumna lamah tâlbuaiin, tuiah a tla hlum ta a ni. A naute chu chhanchhuah an ni thung. 

State Referral Hospital-ah nimin tlai dar 5 thleng khan Covid-19 vei mi panga enkawl mek an ni. SRH-ZMC Bulletin tarlan danin, mi panga zinga pakhat chu ICU-ah awmin, ventilator hmanga enkawl zui zel a ni a, mi dang zawng Isolation ward-ah awmin, harsatna lian tham nei an awm lo. SRH-a enkawl mek zingah hian kum 60 chung lam leh naupang kum 14 hnuai lam an awm lo a ni.