Naktukah budget session ṭan dawn Budget pumpui pharh nghal a ni ang
Mizoram State Assembly budget session chu naktuk, February 23 chawhma dar 10:30 hian ṭan a ni dawn. Tun ṭum budget session-ah hian kum 2021-22 atana Mizoram budget pharh a ni ang.
Ruahman dan chuan, session-ah hian a ṭan ní-ah Governor-in thu a sawi ang a; a tûk, Nilainiah session hmasa leh tun ṭum session inkara ram hruaitu thite sunna hun hman a nih dawn bakah, Governor thusawia lawmthu sawina, motion of thanks put luh a ni ang.
March 1-ah Mizoram budget 2021-22 pharh a ni dawn a, March 3-8 chhungin budget sawihona hun hman a ni ang a, March 9 aṭangin sorkar department hrang hrangte tana sum ruahman (minister demand)-te sawiho ṭan a ni ang. Session hi March 17, 2021 thleng neih tura ruahman a ni.
Finance secretary Vanlalchhuanga sawi danin, tun ṭum budget session-ah hian Mizoram budget thar chu a pumpuia pharh nghal a ni dawn a; budget pangngai bakah, kum kal mek 2020-21 chhunga sum indaih lohna phuhrûkna tur, supplementary demand for grants pharh a ni bawk ang.
Vanlalchhuanga chuan, Covid-19 avangin khawvel pumah sum leh páia harsatna a thleng a, Mizoramah pawh harsatna a thleng tih a sawi a, "Mahse, budget session neih turah budget puitling phar a ni dawn. Budget pharh turah hri léng vangin harsatna a awm phah lo," a ti.
Sorkar hnathawkte January 2021 thla hlawh pek kim a ni tawh tih sawiin Vanlalchhuanga chuan, "February thla hlawh chu central aṭanga sum hmuh dan azira pek a ni ang," a ti a; Covid-19 lên hnuah sorkar laipui aṭanga sum hmuh ṭhin nasa takin a tlahniam a, chuvang chuan sorkar hnathawk pension sum, medical reimbursement bill, health care scheme sumte eng emaw zat pek theih a ni lo tih a sawi.
Finance Secretary chuan, kum danga sorkar laipui aṭanga sum dawn ṭhin, hripui léng avanga Central-in Mizoram sorkar hnena a pek theih loh tling khawm cheng vbc. 1,000 chuang a nih thu sawiin, "Hei vang hian harsatna a thleng. Sum hmuh ṭhat a nih loh avangin bill táng a awm lo thei lo. Chuti chung chuan, harsatna sukiang turin theihtawp chhuah a ni," a ti.