COVID-19: Mizoram dinhmun - Lawngtlaiah enkawl lai tam ber

February 19 leh 20 khan Mizoramah Covid-19 vei mi pahnih ve ve hmuh chhuah a ni a, an vaiin tualchhunga kái niin, natna (symptom) lang pahnih an awm. Inrinniah hripui laka fihlim tawh mi pali chhuahtir an ni a; June 2020 hnua a vawi khat nan Aizawl district chu hripui vei awm tamna ber district a ni lo ve ta.

Covid-19 vei February 19, Zirtawpnia hmuh chhuahte chu TrueNAT-PCR hmanga Champhaia hmuh pakhat leh RAT hmanga Lungleia hmuh mi pakhat an ni a; ZMC laboratory-a swab sample endik zingah hripui vei an awm lo. February 20, In­rinnia Champhaia Covid-19 positive hmuh thar mi pahnihte chu RAT hmanga hmuh chhuah an ni. 

Inrinni khan hripui laka fihlim tawh mi pali chhuahtirte chu Aizawl district-ah mi pathum leh Lawngtlai district-ah mi pakhat an ni a; niminah chhuahtir an awm lo. Nikum June thla hnu lama a vawi khat nan Aizawl district chu Covid-19 vei enkawl mek awm tamna ber district a ni lo ve ta a, Lawngtlai district-ah an tam ber rih a ni. 

Mizoramah Covid-19 vei mi 4,409 hmuh chhuah a ni tawh a, mipa 3,222 leh hmeichhia 1,187 an ni. Nimin tlai dar 5 thleng khan mi 4,377 (99.27%) chhuahtir an ni tawh a, mi 10 (0.23%) thi tawhin, enkawl mek mi 22 (0.50%) an awm. 

February 19, Zirtawpni khan ZMC laboratory-ah swab sample 64, TrueNAT-PCR hmangin district pangaah sample 14 leh RAT hmangin district 11-ah sample 1,213 endik a ni a; sample endik zawng zawng chu 1,291 niin, chu'ng aṭanga Covid-19 positive hmuh chhuah pahnih chu 0.16% a ni.

Inrinni khan ZMC laboratory-ah sample 68, TrueNAT-PCR hmangin Champhaiah sample pahnih leh RAT hmangin district pasarihah sample 570 endik a ni a; sample endik zawng zawng chu 640 niin, chu'ng aṭanga Covid-19 positive hmuh belh pahnih chu 0.31% a ni.

February 20, 2021 thlenga Mizorama swab sample endik tawh zat chu 2,26,302 a ni a, chu'ng aṭanga Covid-19 positive mi 4,409 chu 1.95% a ni. Hripui vei hmuh tawh zinga mi 2,097 chu Mizoram chhunga kái an ni a, mi 2,312 chu Mizoram páwn aṭanga an rawn luh hnua hmuh chhuah an ni thung.

Mizorama district 11 zinga district paruk - Siaha, Kolasib, Serchhip, Mamit, Khawzawl leh Hnahthial district-ahte Covid-19 vei an awm tawh rih lo.

Champhai Vengsang - 1: Hmeichhia kum 29, zin chhuah tum vanga sample endik, hri kàina hriat loh, symptom nei lo.

Muallianpui, Lunglei dist -1: Mipa kum 15, zirlai, hostel luh dawn vanga sample endik, hri kàina hriat loh, symptom nei lo.

Champhai Venglai - 2: Hmeichhia nufa kum 45 & 15; naupang zawk sikul luh dawn vanga sample endik, a positive vangin a nu endik leh a ni. Hri kàina hriat loh, symptom nei ve ve.