District hrang hrangah State Day lawm a ni

February 20, Inrinni khan district khawpui hrang hrangah Mizoram State Day vawi 34-na lawm a ni a; hmun ṭhenkhatah chuan ram hruaitu (legislator)-te'n an hmanpui.

State Day hi Lungleiah chuan Convention Centre-ah lawm a ni a, additional DC R Vanrengpuia'n kaihruaiin, Lunglei district HPC vice chairman Lawmawma Tochhawng, MLA-in a hmanpui. Lungleia sorkar official te, tlawmngai páwl leh political party hruaitute an tel.

Lawmawma Tochhawng chuan, Mizoram hruaitu lo ni tawhte beihna leh an inpekna ropui tak chu Mizo mipuiin an theihnghilh dawn loh thu a sawi a, "State puitling kan nih hnuah hmasawnna ruhrel hrang hrangte nasa taka kan neih belh bakah, zirna leh infiamna lamah te, dan leh thupek kenkawh kawngah te, kan eizawnna lamahte hmasawnna tam tak kan hmu a ni," a ti.

Siahaah chuan DRDA conference hall-ah hman a ni a, DEO H Zonunmawia'n kaihruaiin, MADC chief executive member N Zakhai-a'n a hmanpui. N Zakhai chuan, State Day chu state rálmuang nih nawmzia leh hlutzia te, mipui rorelna sorkar hlutziate mipui hriat nawntirtu ni se a duh thu a sawi.

State Day hi Champhaiah chuan IPR auditorium-ah bawrhsap Maria CT Zuali hoin lawm a ni a; district SP Rex Zarzoliana Vanchhawng, sorkar pisa hotu te, YMA sub-headquarters, MUP, MHIP, MJA leh political party aiawhte an tel.

Kolasib-ah chuan IPR confenrece hall-ah lawm niin, bawrhsap Dr H Lalthlangliana'n a kaihruai a, minister of state K Lalrinliana khuallian a ni.

K Lalrinliana chuan, "State dangte nena khaikhin chuan Mizoram hi state naupang tak angin lang mah se, khawvel thiamna ṭhang chak tak avangin tumna a awm chuan state dangte rual hian hma kan sawn ve thei a ni," a ti a; intodelh tum kawngah intuaithar a, ṭan la thar turin kal khawmte a chah.

Serchhipah chuan DC Conference hall-ah bawrhsap Kumar Abhishek hoa hman a ni a, Thenzawl SDO, Serchipa sorkar pisa hotu te, tlawmngai pawl aiawhte leh chanchinbumite an tel. Bawrhsap chuan, Mizoramin hun rei tak rambuai a tawrh hnuah kum 1986-ah inremna a awm thu sawiin, "Tun thlengin state rálmuang leh hmun him berte zinga mi a lo ni ta," a ti a; mi dangte entawn tlaka nung a, a ṭha zawnga thil thlak thlengtu nih tum turin kal khawmte a chah.

State Day hi Lawngtlaiah chuan DC conference hall-ah bawrhsap Dr Andrew H Vanlaldika hoin lawm a ni a, LADC MDC te, state leh LADC sorkara officer te, tlawmngai pawl leh political party hruaitute an tel. District Bawrhsap leh LADC chief executive member Manghmung Chinzah ten thu an sawi a ni.

Mamit-ah chuan DC conference hall-ah hman a ni a, district additional DC R Vanlalsawta khuallian a ni. Mamit khawpuia sorkar pisa hotu te, tlawmngai pawl hruaitute leh khawtlang hruaitu te, thuthar thehdarhtute an tel.

Khawzawlah pawh bawrhsap Zothanmawia hoin Zaingen YMA Hall-ah State Day lawm a ni a, sorkar official-te leh tlawmngai pawl aiawhte an tel. Zothanmawia chuan, "Kum 1987-a state puitlinga hlankai kan nih hnuah Mizoramin nasa takin hma a sawn a, zirna, lirthei, in leh lo, information technology-ahte hmasawnna a langsar zual hle a ni," a ti.