LESDE buatsaih skill training khâr

Labour, Employment, Skill Development and Entrepreneurship (LESDE) department-in Mizoram páwna hnathawk, Covid-19 léng vanga an hna chána Mizorama haw hmeichhiate tana skill training an buatsaih chu February 19, Zirtawpni khan Aijal Club-ah khâr a ni a; khârna inkhawm hi Man-Power Development Board chairman Zothantluanga, MLA-in a hmanpui.

Zothantluanga chuan, certificate chauh hlawh chhuak lo a, thiamna dik, chhawr tlâk leh eizawnna pe tlak thiamna zir chhuak turin zirlaite a chah.

Training khàrna inkhawm hi LESDE director K Lalhmingliana'n a kaihruai a; deputy director Lalmuanawma sawi danin, Mizoram Youth Commission (MYC)-in North Eastern Council (NEC) hnuaia project hrang hrang kalpui tur a hmuh zingah 'Decentralized skill training for migrant workers' a tel a, chu chu LESDE kutah hlànin, migrant worker mi 100 training pek tura ruahman a ni.

Ram páwna Mizo ṭhalai hna thawk, Covid-19 vanga Mizorama hawte chu MYC chhinchhiah danin mi 2,637 an ni a; LESDE department chu migrant worker 100 tana eizawnna hmuh theihna tur thiamthil zirtir tura tih a nih angin, training an buatsaih ta a ni.

LESDE department  chuan thiamthil zirtir turin training provider pahnih - Mission Foundation Movement leh Divine Computer Centre-te an thlang a; training provider pahnihte chuan Beauty & Wellness leh Employability and Entrepreneurship Skills hnuaiah nail technician, baking technician leh entrepreneurship skill-te ni 35 chhung an zirtir a ni. Aizawl aṭangin mi 60, Lunglei leh Siaha aṭangin mi 20 ve ve an tel.