Minister-in damdawi hmanrua a vailiam

Health & Family Welfare minister Dr R Lalthangliana chuan February 20, Inrinni khan Mamit district-a damdawi-in hrang hrang leh sub-centre-a hman tur damdawi lam hmanrua eng emaw zat a vailiam.

Dr R Lalthangliana chuan, Mamit district-in damdawi lama thiamna nei (medical doctor) bawrhsap an nei chu vannei a tih thu sawiin, "Aspirational district aṭangin Mizoram district 11 zingah pakhatna ni thei turin ṭan la zel ang che u," a ti a, district hnufual aṭangin district hmasawn ber an nih theih thu a sawi.

Mizoram chu India hmarchhak state pariat zingah Covid-19 vanga thi tlemna ber a ni tih sawiin Health Minister chuan, "Pathian leh kan thawhhona vang a ni. Hmasawnna kan hmuh mekte hi a chho zawnga thlira indelh behtir mai loin, hmasawnna tluantling nei turin kan tih ve theih tâwk ṭheuha ṭan kan lâk a pawimawh," a ti. Khawchhak lam aṭanga khawthlang lam hawiin kawngpui sial hna thawh ṭan a nih thu a 

sawi bawk.

Health Minister hian Mamit district DC hmalaknaa REC LTD, CSR Health Project aṭanga lei mobile medical van, drugs & diagnostic kit, laptop leh speaker-te a vailiam a ni.

Hmanrua lei zinga Bolero Camper (4WD BS6) 11 lei nan Rs. 1,04,50,000 hman a ni a; health care delivery - vaccination drive, health camp leh awareness buatsaihna tura lei a ni. Rs. 15,60,000 séngin damdawi chi hrang hrang 76 lei a nih bakah, hmanraw dangte lei a ni bawk.