Leitlangpui Faina Hnatlangpui khâr

Agriculture minister C Lalrinsanga chuan February 19, Zirtawpni khan Lunglei khawpui pum huap faina hnatlang, 'Leitlangpui Faina Hnatlangpui' khârna inkhawm a hmanpui.

C Lalrinsanga chuan, Mizoram khaw­pui fai inelnaah Lunglei khawpuiin lawmman sang ber pahnih a dawng chu ropui a tih thu sawiin, "Faina hian mihring nuna thil pawimawh taimakna, hriselna, rilru thianghlimna, changkanna leh hmasawnnate a keng tel a, tuna chawimawina kan dawnte hi a bul ṭanna chauh a ni," a ti a;faina kawngah mahni zâwn ṭheuha ṭan la turin Lunglei mipui a chah.

Inkhawma tarlan danin, Lunglei chu open defecation free+ (ODF+) ni turin a inpuahchah fel tawh a, endiktute (inspection team) nghah mek a ni. Lungleia chhungkaw tin aṭangin bawlhhlawh lak niin, 100% door to door collection an ni mek a, sumdawnna hmun bikah UDPA department-in bawlhhlawh báwm 600 chuang a húng.

Khawpui hmun lûn lai hmun 100 chuangah faina chungchang inzirtirna thuziak (permanent hoarding) tàr a ni a, Lunglei khawpui chhunga VC tinin VC Sanitation Committee an din tawh. MUP sanitation volunteer-te'n kumtluana faina kawnga hmalakna Leitlangpui Faina Calendar an buatsaih bawk.

Leitlangpui Faina Hnatlangpuiah hian mi 8,000 chuang an hnatlang a; a khârna inkhawmah hian Lunglei khawpui huam chhunga VC 24 te, YMA sub-hqrs, MUP, MHIP, Clean Lunglei leh faina kawnga mahni sum sénga hma la ṭhin mi paruk hnenah lawmthu sawina leh chawimawina hlan a ni.