Chaltlang YMA ram humhalhah hma la mek

Chaltlang Branch YMA chuan thuchhuah siamin, Chaltlang Maumual chhuah lam leh Durtlâng leh Leitan tlâk lama awm Bûngmual leh Mualkhuang ram an humhalh mek enkawl leh humhalh mêkah kumin aṭangin MZU hnuaia department-te nen ṭangkawpin humhalh turin hma an lak thu an tarlang.

Bûngmual leh Mualkhuang tichereu zawng leh pawi khawih tuma kal, YMA thláma bungrua tichhia leh rubo ṭhin an awm thu tarlangin Chaltlang YMA chuan, "Kan ram humhalh chhunga kângmei tichhuak a, ramvâk leh lui sa nghaisa an awm ṭhin a, a pawi hle," an ti a; February 13, 2020-a MZU Zoology department mite nen an tlawh ṭum pawhin, Búngmual leh Maumual inkara luang, Búng lui chu chinaia hrài a ni tih an hmuh thu an sawi.

Chaltlang Branch YMA chuan, an ram humhalh leh enkawl laia pawi khawih an awm ṭhin chu pawi an tih thu sawiin, "YMA leh a thawhpuite hmalakna tiṭhuanawp a, thlám leh a chhehvel suasam a, ram leh luia bawlhhlawh hnutchhiah a, thing leh mau leh nungchate tichereu zawnga che ṭhinte chu insasenga sim nghal turin kan ngen a ni," a ti. An ngenna ngai pawimawh loa ti lui an awm chuan an chungah hma an lak tur thu an tarlang.

Chaltlang YMA tarlan danin, Búngmual leh Maumualte chu thing leh mau ṭhatna hmun leh hnawmhnawk leh bawlhhlawhin a tihbawrhbàn loh lui eng emaw zat luanna a ni.