NITI Aayog-ah Mizoram mamawh thlen

NITI Aayog Governing Council chu February 20, Inrinni khan prime minister Narendra Modi hoin video conferencing kaltlangin an ṭhu a; chief minister Zoramthanga'n Mizoram mamawh hrang hrang a thlen.

Chief Minister chuan, centrally sponsored scheme leh central sector scheme hnuaia sum hmuhte sorkar laipui leh state sorkarte'n an insem dan chu state harsa zawkte tan a tam tâwk loh avangin ngaihtuah nawn ni se a duh thu a sawi.

Oil palm chíngtute harsatna sawiin Zoramthanga chuan, "Company-te'n an khàrchhàwnna rate a hniam lutuk hi ennawn theih ni se. Tlang ram lo neih aṭanga lo hmun nghet neia inthlak chungchanga NITI Aayog hnuaia working group pakhatin report a siam tawh zûlzuiin Mizorama tlang ram lo neih bànsan a, lo nghet neia eizawnnaa inlêt turin hmalakna atan sorkar laipui puihna kan mamawh," a ti.

CM Zoramthanga chuan, mipuiin hriselna ṭha zawk an neih theih nan thingtlang hmun hla zawkah sub-centre mamawhna a nasat thu sawiin, hma laksak turin PM a ngen a; NHM hnuaia sum hmuhah indaih lohna a awm thu te, IDSP thawm ṭhat a pawimawh thu leh, ZMC chu regional medical college-a hlànkai a nih theih nan hma la turin a ngen bawk.

Mizoramah digital connectivity a la ṭhat loh thu sawiin CM chuan, "Sorkar laipui hmalakna kal mek Bharat Net chu Mizorama kalpui thuai ni se," a ti.

Meeting agenda zingah, India ram chu thil siam chhuahna hmunpuia siam te, agriculture kalphung sâwi danglama tihhmasawn te, mihring thiamna leh theihna tihhmasawnte leh hriselna chungchang leh hmasawnna rualkhai zawk neihna turin a bulṭhut tihhmasawnte a tel a ni.