KHAWTHLIR

Home minister Lalchamliana chuan nimin Assembly Session-ah ZPM member Lalchhuanthanga zawhna chhangin Mizoramah Chakma dan loa lut ru an awm leh awm loh hriat a nih loh thu House a hrilh a, "Mizorama Chakma dan loa lut rute dap chhuah hna hi Mizoram sorkar hmalakna kal lai mek a ni," a ti.

Nimin khan technical assistant-te tan Planning department conference hall-ah Census 2021 training neih a ni a, vawiinah zawh a ni ang. Training hmanpuitu Aizawl DC Vanlalngaihsaka chuan technical assistant-te chu Census 2021 atana lak an nih thu a sawi a, "Kum 10 dan chauha thleng ṭhinah hian chanvo pawimawh tak chelhtu turte in nih angin in hna hi uluk leh fimkhur takin thawk ang che u," a ti.

National Commission for Women-in hmeichhiate dikna leh chanvo humhalhna atana hmalakna pakhat atana India ram state zawng zawngah Power Walk neih tura a tih angin nimin khan Mizoram State Commission for Women chuan Millenium Centre aṭanga Vanapa hall thleng kawng an zawh.

Aizawl DC chuan thupek chhuahin, Aizawl district huam chhunga luite chu CrPC sec 144 hmangin humhalh a nih thu a tarlang a, nungchate an dam khaw chhuah theih nan bawlhhlawh leh lei vung reng reng sorkarin paihna tur hmun a siam ni loa paih a khap. Thupek hian thla hnih chhung a huam ang.

Nimin chawhnu dar 2 vel khan Melthum bulah city bus-in C Lalengmawia (59), Damveng, Aizawl a chíl hlum. Thu dawn danin, bike pakhatin bus tlân pelh a tumna lamah intipalh­in, bike chu bus hnuai lamah a tlu lut a, bike hnunga chuang C Lalengmawia chu bus-in chíl nghalin, a hmunah a thi a ni. Bike khalhtu erawh a na lo thung.