Valentine's Day-ah mi 888-in thisen an pe Thisen petute Mizo nih tinuamtu - Dr Thangtea
Association for Voluntary Blood Donation (AVBD) leh an thawhpuite chuan, Valentine's Day pualin Mizoram district hrang hrangah Blood Donation Camp an huaihawt a, mi 888-in thisen an pe. Donation camp pui ber, Aizawla khuallian Health minister Dr R Lalthangliana chuan, Mizo ṭhalaite'n phût lêt nei loa mi nunna chhanna atana an thisen hlu tak an pe ṭhin chu Mizo nih tinuamtu an nih thu a sawi.
Valentine's Day Blood Donation Camp hi Aizawlah chuan Dawrpui Multipurpose Centre-ah huaihawt a ni a, chawhma dar 10-ah thisen pek ṭan a ni. Chhun dar 12:30-a inauguration programme chu Health Minister-in a hmanpui a; Minister chuan, "Mahni tana hlâwkna tur ngaihtuah loa mi dangte tana malsawmna ni tura ngaihtuahna leh sum senga AVBD-te'n hma an la a, thisen pêk rûnpui an buatsaih ṭhin hi a lawmawm hle a ni," a ti.
Dr R Lalthangliana chuan, kum 2019-a Cabinet meeting hmasa berah sorkar hmasain blood processing fee a lak ṭhin titawp turin thutlukna siam a nih thu leh hman nghal a nih thu a sawi a, "Blood processing fee tihtâwp hi sorkar damdawi-in bikah a ni phawt a, sorkarin a ṭul angin a ngaihtuah zel ang," a ti a; blood processing fee tihtawp vanga sum sen ngai tam tak awm chu sorkar kum tharah mumal zawka kalpui a nih tur thu a sawi.
Valentines Day-a thisen pek rûnpui huaihawt ṭhin chu kum 2010-a ṭan niin, kum 10 lai neih ni tawh mah se, tawp mai loin, a thlawna thisen pek bul ṭanna ni zel se a duh thu sawiin R Lalthangliana chuan, Mizo ṭhalaite chu thisen pek uar zel turin a sáwm a; "Hetianga mi dangte tana malsawnna ni tur leh mi nunna chhanna atana
ṭhalaite'n an thisen hlu tak an pe ṭhin hi Mizo nih tinuamtu a ni," a ti.
AVBD president C Lalnunnema chuan, Valentines Day-a thisen pek rûnpui huaihawt ṭhin chu kum 2010-ah mi ṭhahnemngaiten bul an ṭan a, tunah chuan AVBD-in a huaihawt tak thu a sawi a, "Ṭhalaite'n kan hlut chho zel a, tunah chuan khawvelin min hriatpui tawh a ni," a ti a; khawvel hmun dangah pawh he ni puala blood donation camp huaihawt hriat tur an awm ve nual tawh thu a sawi.
C Lalnunnema chuan, AVBD thil tum ber chu, Mizorama thisen mamawhte a thlawna pek vek, 100% voluntary donation a nih thu sawiin, chutiang thleng tur chuan AVBD ni loin, Mizo mipui an pawimawh ber thu a sawi a ni.
AVBD joint secretary Lalrinfela tarlan danin, Valentines Day puala kum 2010 aṭanga thisen pek rûnpui huaihawt a nih aṭangin Valentines Day Blood Donation bikah thisen unit 5,764 pek a ni tawh a; pek tam ber kum, 2018-ah chuan mi 1,12-in an pe a ni.
Blood Donation Camp hi AVBD-in MSACS, Aizawl Civil Hospital Blood Bank leh Music Domain Mizoram (MDM)-te ṭanghoa an buatsaih a ni a; zaithiam eng emaw zat zaiin, thisen petute an âwi a, thisen petute hnenah rose leh thisen pek lam hawi ziahna bánbun pek zel a ni bawk.