Joint NGO-in lawmthu an sawi

NGO Coordination Committee (Joint NGO) chuan thuchhuah siamin, Citizenship (Amendment) Bill, 2016 pass a nih lohna tur leh dodalna kawnga Mizo mipui ṭanrualna leh inpekna chu lawmawm an tih thu an tarlang.

Joint NGO chuan, CAB chu Mizoram leh hnam tana ṭha lo leh him loa an hriat avangin theihtawp chhuahin kum 2017 aṭangin dodalin hma an la tih an sawi a, "Thuneitute hnena ziaka thlen a nih bakah, chetziaa dodalna lantirin, Republic Day hial pawh boycott a lo ni a, CAB chu Lok Sabha-in a pass hnuah, Rajya Sabha chuan a pass ta lo a ni," an ti.

CAB pass a nih tak loh chungchangah hian Joint NGO chuan, "Mihringte'n kan tih theih piah lamah, Pathian hnathawh ropui tak a lo lang. Mizo Kris­tian­te mangang au aw leh Pathian hnena ṭawng­ṭainate chhana a awm hi a ropui tak zet. Mizo mipuite'n Pathian thiltih­theihna leh awmpuina kan dawng niin kan ngai," an ti a; hun lo kal leh zel turah pawh a ṭul ang zela ram leh hnam tana ṭang rual zel turin Mizo mipui an beisei tih an sawi bawk.