Bilkhawthlir buh sorkarin a leisak

Agro Farmers Society, Bilkhawthlir hnuaia kut hnathawk inziak lutte buh thar chhuah chu Mizoram sorkarin a vawi khatna atan nimin khan Bilkhawthlir khuaah a leisak ṭan.

Agro Farmers Socie­ty chairman C Lalchhuan­awma chuan, FCSCA minister K Lalrinliana’n an harsatnate hriatthiam­puiin,  an buh tharte deh ralna tur kawng a dapsak avangin lawmawm a tih thu a sawi.

C Lalchhuansawma sawi danin, Bilkhawthlir khuaah buh thar chhuah theihna ram hectare 500 vela zau a awm a, vawi khatah buh quintal 4,445 an thar chhuak thei.

Kum khat chhungin vawi hnih an thar thei a, kum khatah buhfai quintal 9,000 vel an thar thei a ni. Bilkhawthlir khuain kum khata buh ei tur an mamawh zat chu quital 5,200 vel a ni a, an mamawh zat aia quintal 3,500 chuanga tam an thar chhuak theih a ni.

Buh inleisaknaa Mizo­ram sorkar aiawha kal K Laldawngliana, MIZO­FED chairman chuan, sorkarin MIZOFED kaltlangin buhfai quintal 23 a leisak thu leh Food Corporation of India rate angin quintal khat Rs. 2,750-a a leisak thu a sawi.