CAB tihtawp vangin ZPM an lawm

ZPM Val Upa Council, Caucus, ZPM Legislator Party leh ZPM Research Wing-te chu nimin khan Durtlangah nilêngin an thukhawm a; thuchhuah siamin, Citizenship (Amendment) Bill, 2016 (CAB) hnâwl a ni ta chu Pathianin a mite ṭawngṭaina a chhannaah an pâwm a, kohhran leh NGO Coordination Committee hmalakna thlawptu zawng zawng chungah lawmthu an sawi.

ZPM meeting chuan, kum 2018-a MLA inthlana Pathian leh mipuite zara bial pariat laia hnehna an chang chu lungawithlak an tih thu sawiin, "Kum 2023-ah Mizoram mipuite'n an duh ber 'Kalphung thar, mipui sorkar' a ding tawh ngei ang tih kan ring," an ti.

Lok Sabha inthlan leh MLA bye-election lo awm tur chungchang an sawiho a, "India rama sakhaw tenau leh hnam hnufualte dîpral dan kawng daptu BJP leh an tha tichaktute chu ZPM chuan theihtawpin dodâl a tum a, kan sakhua leh kan hnam himna atan ṭangrual a, rilru fim taka inthlan hmachhawn turin Mizoram mipuite kan sáwm a ni," an ti bawk.