ITI Vengah Fire Station building hawng

Home minister Lalchamliana chuan, nimin khan ITI Vengah Fire Station building a hawng. Minister chuan, Fire Station building hawn thar ni chu Police leh Fire & Emergency Services-te tan ni chhinchhiah tlak a nih thu a sawi.

Lalchamliana chuan, Mizoramah fire station a indawta siam a nih thu leh fire station 12 a awm tawh thu a sawi a, "Aizawl hi khawpui ṭhang chak tak leh traffic pawh lûn em em a nih avangin, kângmei a chhuah palha a rang thei ang bera a hmun thlen a nih theih nan fire station pali siam a ni a, ITI Venga Fire Station hi Mizorama station 12-na a ni," a ti.

Khawpui ṭhang zelah, kângmei chhuahna hmuna a rang thei ang bera thlen theih chu Fire & Emergency Services tum ber ni mah se, kângmei chhuak lo tura ṭan lak leh fimkhur a pawimawh thu sawiin Minister chuan, "Fire Prevention Week hman mekah in leh ram a kan loh nan meizial bung rama paih loh te, bati chhit tihhlum ṭhatte a pawimawh," a ti a; fire motor leh hmanraw chi hrang hrangte chu hman ngai lo se tih chu a duhthusam a nih thu a sawi.

PWD executive engineer Hrangthanga Zote tarlan danin, fire station building sak nan hian 13th. Finance Commission aṭangin cheng nuai 267.52 hmuh a ni a, November 2012-ah sak ṭan niin, chhawng li-a sak a ni.

Station hawnna inkhawmah hian MLA Lalrinsanga Ralte, AMC councillor Lalthansanga, DGP Balaji Srivastava, chief information commissioner Zorammawia, Fire & Emergency Services director LR Dingliana Sailo leh mi dangte an tel.

Report-a an tarlan danin, kumin January-ah thla chhung khan in kâng panga a awm a, ram kang hmun pakuaah leh thil dang kâng paruk a awm bawk a; kângmeiin a tihchhiat zawng zawng chu Rs. 26,95,000 hûa chhût a ni.