Upa zah lohna ramah malsawmna a awm ngai lo - Lalrinliana Sailo

Assembly speaker Lalrinliana Sailo chuan nimin khan Phuaibuang khuaah Tuivai Area Mizoram Upa Pawl Conference vawi 9-na a hmanpui a; thu sawiin, upa zah lohna ramah malsawmna a awm ngai lo niin a sawi.

Lalrinliana Sailo chuan, upa tamna khua apiang chu khaw nuam a nih ṭhin thu sawiin, "Upate tawnhriat tamna hi khawtlang tan malsawmna a ni ṭhin a ni. Hmanlaia sapui zîmnaah upa lamin, a tâwk tawh e an tih chuan a tawk a, a him a ni. Chuvangin, thil tihna apiangah tawnhriat ngah upate hian a tawk e, an tih china duh tâwk hi a him ṭhin," a ti.

Assembly Speaker chuan, "Upate zah lohna ramah malsawmna a awm ngai lo a, an tluang ngai lo. Tuna kan upate hian thil tam tak an ti thei lo, mahse, tu leh fate tan leh Zoram tana ṭawngṭai hi in ti thei a ni," a ti a; upate chu ram leh hnam tana ṭawngṭai uar turin a chah a ni.