Shehri Samridhi Utsav buatsaih a ni

Urban Development and Poverty Alleviation (UDPA) department chuan, khawpui hmasawn zelna tur kûtpui, Deendayal Antyodaya Yojana - National Urban Livelihoods Mission (DAY-NULM) Pakhwada 'Shehri Samridhi Utsav' chu nimin khan Aizawl City Park-ah an buatsaih ṭan a; Labour, Employment, Skill Development & Entrepreneurship (LESDE) minister Lalchhandama Ralte-in a hawng.

Lalchhandama Ral­te chuan, kawngpui, in leh inbiakpawhna ṭhate chu hmasawnna ni mah se, rethei leh hausa inkar a hlat a, mipui hmasawnna a inkhairual loh chuan hmasawnna tluantling a ni thei lo tih a sawi a, "Khawpuia mi rethei zawk te, pianphunga rualbanlote leh hmeichhiate'n hma an sawn theihna tur DAY-NULM hnuai­a hmalakna hrang hrang - self help group (SHG) hnena ṭanpuina pek theih te, loan pek theih dan te, rualbanlo leh hmeichhiate hamṭhatna a ken telte hian khawpui hmasawnna tluantling neih kawng­ah kawngro a su hle dawn a ni," a ti.

Shehri Samridhi Utsav hi India ramah February 1-15 chhung­in hman mek a ni a, Mizoramah pawh district tinah hman a ni. Kûtpuiin a tum chu DAY-NULM hnuaia hamṭhatna awmte pholan a, khawpuia cheng mi retheite tan sum lakluhna kawng mumal tak a awm tih hriattir a ni.

Shehri Samridhi Utsav-ah hian SHG Expo, Street Food Festival leh Job Fair buatsaih a ni a, vawiinah chhunzawm tur niin, zan dar 9 thleng tlawh theih a ni ang.

Hawnna inkhawm hi UDPA secretary Dr C Vanlalramsanga'n a kaihruai a; Minister Lalchhandama Ralte chuan loan sanction letter a sem chhuak nghal a ni.