CAB dodal ṭha ngam lo-ah CM puh

ZPM chuan thuchhuah siam­in, Citizenship (Amendment) Bill, 2016 chu tihtawp a ni ta tih sawiin, lawm­awm an tih thu an tarlang a; chutih rualin, chief minister Zoramthanga chu BJP mitvei ven vanga CAB dodal ṭha ngam lo-ah an puh.

ZPM chuan, CAB vanga Mizoramin lungngaihna leh manganna namên lo kan tawh laia chief minister Pu Zoramthanga’n Central-a BJP mitmei a ven vanga pa ber chan a chan ngam loh lai pawha zirlai pawl, NGO-te leh eptu party-te'n ram leh hnam hmakhua ngaia theihtawp an chhuah bakah, kohhran mipui ṭawngṭaina azarah CAB tihtawp a ni ta hi lawmawm kan ti hle," an ti.

CAB kaltlangpui a nih tâk loh chungchanga CM Zoramthanga’n sorkar laipui, NDA sorkara lawm­thu a sawi ringawt chu mak an tih thu sawiin, "NDA sorkar hian CAB pass luih an tum em em, Rajya Sabha-a an nawr tlang zawh loh vanga zûzi ta a ni," an ti a; CM Zoramthanga lawmthu sawi dan chu ‘Pawngsual tum hlawhchham ta chunga lawmthu sawi ang' chauha an ngaih thu an tarlang.