Zoramthanga'n pawnfen féng rawh se - MPYCC

Congress party ṭhalaite chuan thuchhuah siamin, chief minister Zoramthanga chu huaisen taka Citizenship (Amendment) Bill, 2016 (CAB) dodal ve ngam lo-ah an puh a, "Pu Zoramthanga leh a hote hian pawnfen féng rawh se," an ti.

MPYCC chuan, CAB chu theihtawpa kawng hrang hranga dodal a nih hnuah pass a ni ta rih lo chu lawmawm an ti tak zet thu sawiin, "Bill dodalnaa ngaihtuahna séngtu, tha leh zung thawhtu Mizo mipui, NGO te, political party te, mimal anga ṭhahnemngaia veitu leh mahni theihna zâwna theihtawp chhuahtute zawng zawng chungah lawmthu kan sawi," an ti a; CAB dodalnaa theihtawp chhuahtu Rajya MP Ronald Sapa Tlau leh Lok Sabha MP CL Ruala hmalakna chhuahawm an tih thu an sawi.

CAB chu ûmbo hlen tur chuan Lok Sabha inthlanpuiah BJP leh an thawhpuite paihthlak a, NDA sorkartir loh ngei ngei a ngai nia sawiin MPYCC chuan, "Chu chu Mizo mipuite'n kan hma lawk MP thlan lo awm tur hmang hian kan tihlawhtling thei. Vawiin nia Rajya Sabha-a BJP (NDA+NEDA)-in majority an nei loh hi kum hnih hnuah majority an neih theih dawn avangin, Lok Sabha inthlanpuiah paihthlak ngei a ngai a ni," an ti.

Congress ṭhalaite chuan, Mizoram ṭhenawm state sorkarte'n mahni sorkar phata CAB an dodal laiin, Mizo mipui beisei angin Mizoram sorkarin na takin CAB a dodal ve ngam lo nia sawiin, "Mak kan tiin kan dem hle a, hlau leh khûr chunga rân dâla Pu Zoramthanga'n Prime Minister leh Home Minister te thil dang dil paha CAB chungchang a sawipui nia rin, MNF-in CAB a sawi pui, an tih hi a video clip Mizo mipui min present turin kan phût a ni," an ti a; CM Zoramthanga leh MNF-te chu tih tak taka CAB dodal ngam lo-ah an puh a ni.