KHAWTHLIR

Governor Kummanam Rajasekharan chuan February 13, Nilaini khan Kerala state-a Wayanad khuaah Uravu Indigenous Science and Technology Study Centre-a mau sâwngbawltute leh mau hmanga eizawng­tute a tlawh. Larsap chuan, Mizoramah mau tam tak a awm thu leh thawhhona leh insumdawn tawnna a awm theih a beisei thu a sawi a; Mizoram tlawh turin a sáwm a ni.

Mizoram SSA Teacher's Association chuan Chief Minister's Relief Fund-ah Rs. 10,000 an chhung lut. 

Save Chite Lui Coordination Committee (SCLCC) chu February 13, Nilaini khan Aizawl DC pisaah Aizawl bawrhsap mawhphurhna latu VL Hruaizela Khiangte hoin an ṭhukhawm a; SCLCC hnuaia Chite lui chhanchhuah leh humhalh kawnga beihpui thlakna Action Plan Phase-II hmanga hmalak dan turte an sawiho a ni. 

Mizoram KVI Board chairman thar Lalthanliana chuan nimin khan a pisa thar, New Capital Complex-a mi a luah ṭan a, Pathian hnena hlanna inkhawm neih a ni. Lalthanliana chuan, Mizoram hmun hrang hranga KVI hnathawkte chu rinawm leh taima taka Zoram hmasawnna atan thawk turin a chah. KVIB Chairman thar hi sorkar term liam taa Aizawl North-II bialtu MLA a ni.

UPC (NEI) ṭhalai, Pentecostal Youth Department (PYD) Aizawl East District chuan nizan aṭang khan Champhai Be­thel Field, Chhura hmun­ah Conference vawi 25-na an hmang ṭan a, Pathianni zan­ah a ṭiak ang. Inkhawmpui thupui chu 'Pathian beisei rawh' tih a ni.

Kolasib DC thar Zoengsanga chuan nimin khan DC Conference Hall-ah Kolasib District NGO Coordination Committee hruaitute a kâwm a, Kolasib district hmasawnna atan thawpuiah a sáwm. 

Nimin tlai dar 4 vel khan city bus, Miriami tih chu Zemabawk petrol pump bulah a tawlh liam a, driver Lalhmahruaia s/o B Rohmingthanga, Zemabawk North Field Vêng a hmunah a thi. Conductor Lalnuntlina, Bawngkawn a hliam bawk.