Mizorama HIV vei hmuh tawh zat 19,631 Thla 6 chhungin HIV+ve 1,353 hmu chhuak

Mizoramah October 1990-ah HIV hrik pai hmuh chhuah ṭan a ni a, chuta ṭanga March 2019 thleng khan Mizoram pumah HIV vei mi 19,631 hmuh chhuah an ni tawh. Heng zinga 66.08% chu mipat hmeichhiatna aṭanga kai an ni. Thla ruk (October 2018 - March 2019) chhungin HIV hrik pai hmuh chhuah thar 1,353 an awm.

Mizoram State AIDS Control Society (MSACS) chhinchhiah danin, Mizoramah October 1990 aṭanga March 31, 2019 thlenga HIV vei hmuh chhuah tawh mi 19,631 zinga 17,897 chu general client (mipui nawlpui) an tih 

aṭangin a ni a, mi 1,734 chu nu nau pai (ANC) aṭangin a ni thung. ANC hi kum 2005 aṭangin a bika chhinchhiah a ni.

General client bikah, HIV hrik pai hmuh chhuah tawh 17,897 zinga 11,828 chu mipa niin hmeichhia 6,069 an ni a; chu'ng zinga 11,827 (66.08%) chu mipat hmeichhiatna hman aṭanga kai an ni a - mipa 6,827 leh hmeichhia 5,000 an ni. Mipat hmeichhiatna kaihhnawih tho, anpui kawp (homosexual/bisexual) aṭanga kai mi 185 (1.03%) an awm bawk.

Infected an tih, hriau thianghlim lo hman aṭanga kai mi 5,040 (mipa 4,372 leh hmeichhia 668) awmin, 28.16% an tling a; nu aṭanga kai mipa 257 leh hmeichhia 272, an vaiin mi 529 (2.96%) an awm. Kai chhan hriat loh mi 316 (1.77%) an awm bawk a, chu'ngte chu mipa 187 leh hmeichhia 129 an ni.

HIV hrik pai hmuh chhuah tawh zingah anti retroviral therapy (ART) damdawi la tura inziak lut zawng zawng chu 14,744 an ni a, ART damdawi la tawh mi 11,944 awmin, la mek mi 8,568 an awm. HIV/AIDS avangin mi 1,474 an thi tawh a, chu'ngte chu puitling bikah mipa 924 leh hmeichhia 518 an ni a, naupang 32 an thi tawh bawk.

MSACS chhinchhiah dan chuan, September 2018 thlenga Mizorama HIV hrik pâi hmuh chhuah tawh zat chu mi 18,278 an ni. March 31, 2019 thlenga hmuh chhuah tawh zat chu 19,631 a nih avangin, thla ruk (October 2018 - March 2019) chhungin HIV hrik pai hmuh chhuah mi 1,353 an awm tihna a ni a; chawh rualin thla ruk chhung hian thla tin HIV hrik pai mi 225.5 hmuh chhuah an awm tihna a ni bawk.

Nu nau pai zingah, September 2018 record-ah HIV hrik lai hmuh tawh 1,642 a nih laiin, March 2019 record-ah chuan 1,734 an tling tawh a, thla ruk chhungin mi 92-in an pung tihna a ni. September 2018 record ang chuan, general client bikah mipat hmeichhiatna aṭanga HIV kai 66.67% an nih laiin, March 2019 record-ah chuan 66.08% an ni a, mipat hmeichhiatna aṭanga kai an tlahniam hret. 

Inchiuna atana hriau thianghlim lo hman (infected) aṭanga kai September 2018 thlengin mi 4,356 (27.43%) an awm laiin, March 2019 record-ah chuan 5,040 an awm a, thla ruk chhungin mi 684-in an pung tihna a ni.

Anpui kawp vanga kai September 2018 record-ah 157 an awm a, March 2019 record-ah chuan 185 awmin, 28-in an pung.

Nu aṭanga kai September 2018 record-ah 515 awmin, March 2019 record-ah 529 an awm a, kai chhan hriat loh September 2018 record-ah mi 309 leh March 2019 record-ah 316 an awm bawk.