BJP-in sum hmangin MNF kut An phuar tlat - Lal Thanhawla
MIzoram Pradesh Congress Committee (MPCC) president Lal Thanhawla chuan, nimin khan Congress Bhavan-ah thu a sawi a, "MNF-te chu BJP-in sum hmangin an kut an phuar tlat a, chuvangin, The Citizenship (Amendment) Bill, 2016 (CAB) chungchangah an che eih ngam lo," a ti.
CAB duh loin state dangah chuan sorkar an che nasa tih sawiin Lal Thanhawla chuan, "State dangah chuan lungawi lohna lantirnaah zirlai rualte'n an kal. Keini ramah chuan MNF-te NEDA-ah member an nih vang leh NDA thlawptu an nih vangin CAB vangin an che ve ngam lo. Chutiang sorkar chu kan nei mek a ni," a ti a; CAB vanga Mizoram sorkar a che ngam lo chu vanduaithlak a tih thu a sawi.
MPCC President chuan, MNF tan NDA chu bànsan a harsat tur thu sawiin, "Inthlanah sum tam tak an pe a, an candidate-te an chêt theih phah. Mizoram BJP aiin Congress beihna atan MNF ṭha zawk tura an ngaih avangin MNF sumin an vûr a, Mizoram BJP pawh an vui hial a ni. MNF-te hi sum hmangin BJP-in CAB-ah an ká an hup bet," a ti.
Central-ah BJP nasa takin an tlahniam nia sawiin Lal Thanhawla chuan, "Oppostion hoin BJP an sorkar leh chuan kan chhe vek dawnah an ngai a, chhim lam phei chuan BJP an sorkar chuan India ram inṭhen darh a ngai hial turin an ring," a ti a; eptu pawl inngeih lo tak takte pawh ram chhanna turin thawhho an tum mek niin a sawi.
Lal Thanhawla chuan, uluk taka Finance Minister hoa sum enkawl a nih avangin Congress sorkarin sum tam tak an hnutchhiah nia sawiin, "Kan sum kalsante an chên mek. Sum neih tharna hun a la ni lo a, a hmanna tura kan ruahman ni lo, an lansarh theihna tura an ngaiha an hmang nasa. Anmahni pualin budget an neih hunah 'dekhega' kan ti ang chu," a ti.
Chief Minister-in thil ṭha tih a duh chu lawmawm a tih thu sawiin Hawla chuan, "Hlawhtling ngei se kan duh. Mahse, kan CM hi a eiruk a chhehrelh hman loh cheng vbc. 9 police-in an la kawlsak reng a ni. Hetiang CM hnuaiah chuan ram ropui kan thleng dawn lo," a ti a; MNF sorkar hnuaiah chuan Mizoram sum dinhmunin chhiat lam a pan dawn niin a sawi.
Congress President chuan, kum 2016-17 leh kum 2017-18 kha hmasawnna lama Mizoramin state a nih hnua a tawnsan lai ber a tawng tih sawiin, "MNF sorkar hi an han kal deuh hlek ang a, mipuiin Congress sorkar an ngai leh thuai ang," a ti a; an party mi leh sate chu indawm kun mai lo a, tlûkna a awm chuan thawh lehna a awm tih hre reng turin a chah.
Zu zawrh chungchangah MPCC President chuan, "Zu hi a ṭha êm a, i zuar ang u, kan ti lo. Khawvel awm chhung chuan tualthah, uirena sualte a awm dawn a, zu pawh a awm reng dawn. Zu ai chuan tualthah, uirena, ruihhlo leh vaihlote hi a hlauhawm zawk. Zu buaipui lo hnam nih hi kan duh ber a ni a, zu i buaipui lo deuh teh ang tiin zu zawrh a ni. Zu hi a in lo pawhin an buaipui, Mizote aia zu buaipui an tam lo," a ti.