MṬKP palai aṭangin Registration fee lak an rêl

Tlabung khuaa Licheng Field-a pandal sak, Sap Upa leh Pu Buanga Rûnah Mizoram Ṭhalai Kristian Pawl (MṬKP) Inkhawmpui vawi 47-na neih mek zel a ni a; nimin khan kum 2019-2022 chhunga MṬKP office bearer turte thlan a ni a, MṬKP Inkhawmpuiah palai registration fee atan Rs. 50 zel lak an rel. 

Nimina an rorel hriat theih chinah - MṬKP in­khawm­pui palai registra­tion fee atan Rs. 50 zel lak te, internet lamah BCM kohhran mi leh sate thuziak chhiar tur a tam lehzual theihna turin hmalak te, HATIM non-residence pualin ṬKP unit tin vawi khat fehchhuahte a tel.

Ruihhlo ngaite chhan­chhuah kawngah MṬKP-in hma la rawh se, tih leh, MṬKP-in career guidance chungchangah hma la rawh se, tihte an rel bawk.

MṬKP office bearer tharte chu - president-ah Rev. Vanlalmuankima (BCM ruat); vice president-ah V Rokhawlkima, Lunglei Chanmari Bial; organiser-ah Rev. K Lalbiakenga (BCM ruat); assistant sec­retary-ah K Lalawmpuia, Chanmari Bial; treasurer-ah Lalnuntluanga, Lunglawn Bial; finance secretary-ah Zothantluangi Khiangte, Zotlang Bial; senior adviser Upa PC Vanlalrova (BCM thlan), Lunglei Electric Veng Bial leh, Upa Lalchhanhina Fanchun (BCM ruat), Lung­lei Chanmari Bial-te an ni. 

MṬKP Inkhawmpuiah hian nimin tlai thleng khan palai mi 6,200 vel an thleng tawh a, an la thlen belh zel. Ningani zan khan palai lawm inkhawm neih a ni a, inkhawmpui thupui chu 'Pathian hmangaihna' tih a ni.