Theihtawp kan chhuah chuan ruihhlo lakah Hnehna kan chang ngei ang - END Minister

Mizoram Excise & Narcotics Service Association (MENSA) chuan nimin khan an department conference hall-ah inkhawmpui an hmang. Khuallian, Excise & Narcotics department (END) minister Dr K Beichhua chuan, theihtawp chhuah a nih chuan ruihhlo laka hnehna an chan ngei tur thu a sawi.

MENSA inkhawmpui hi an president Lalchansanga Sailo-in a kaihruai a; Dr K Bei­chhua chuan, ram dang leh state dangte'n ralthuam hmangin an do lo tih sawiin, "Ruihhlo hmangin min do mek. Silai nen kan ṭhalaite an kâp hlum lo a, hmeithai min siamsak hek lo. Silai hmangin kan ṭhalai pahnih vel kap hlum se hnam angin kan thawk chhuak nghalin ka ring. Kan do tur hmangaih tlat thawktute zingah kan awm chuan a rem dawn lo, kan do tur hi kan huat a ngai," a ti.

END Minister chuan sorkarin ruihhlo do a ngai pawimawh tih sawiin, "Zu zawrh phalna dan siamṭhat a nih hnu phei chuan thil rip tak, thil harsa kan koah mawhphurhna a awm dawn tih pawm nghal tur. Zoram ball kan ni dawn tih hi kan pawm nghal thlap a ngai. Excise force ringawt ngaihtuah chuan a huphurhawm a, mahse, min pui tur kohhran leh tlawmngai pawlte an awm. Theihtawp kan chhuah chuan hnehna kan chang ngei ang," a ti a; END-a thawktute chu zâm lo turin a fuih.

END commissioner Ngur­chungnunga Sailo chuan, sorkarin zu khaona dan tihdanglam a tum avangin END-a thawk zawng zawng an pawimawh lehzual dawn tih sawiin, "District lama awm zawng zawngte pawh taksa leh rilruin lo inbuatsaih lawk a ngai. Thawktu zawng zawngte'n hna ṭha taka an thawh theihna atan mahni hriselna ngaih pawimawh a ṭul," a ti.

MENSA inkhawmpuiah hian chawhnuah ro an rel a, hruaitu thar an thlang bawk. Tun din­hmunah END-ah hian post 515 a awm a, chung zinga 119 chu post ruak a ni.