Magistrate order leh AMC office order a inkalh DM order zawm a ni lo, AMC order zawm a ni

Aizawl District Magistrate-in Cr.PC 144 hmanga Aizawl khawpui chhung hmun ṭhenkhata kawngpui sír kea kalna (footpath)-a thil zawrh khapna a nih thu a puan chu sût a la ni lo a, a la ding mek zel. Chutih laiin, footpath-ah mi ṭhenkhatin thil an la zuar mek zel tho a, an inzawrh theih chhan hi Aizawl Municipal Corporation (AMC) office order vang nia thu dawn a ni. 

Aizawl District Magistrate (Judicial) chuan January 24, 2019 khan thupek (Order) chhuahin, Aizawl khawpui hmun ṭhenkhata kawngpui síra ke-a kalnaah mi ṭhen­khatin thil an zawrh avangin mipui kal velna a tibuai a, lirthei tlan vel nen intawhsual palh a hlauhawm avangin, mipui himna atan Cr.PC 144 tlawhchhanin footpath-ah thil zawrh phal lohna thupek a chhuah.

District Magistrate order-in thil zawrh phal lohna a tarlante chu - Sikulpuikawn leh Mission Veng biak-in inkar kawngpui kam leh kea kalnaah te, Land Revenue & Settlement Directorate leh Excise & Narcotics Commissionerate inkar kea kalnaah te, Tennis Court chhehvel kawngpui kam leh kea kalnaahte leh, Tennis Court leh Agriculture Directorate inkar kawngp kam tawn tawnahte a ni. 

Thil zawrh phal loh tih hian Inrinni leh sorkar pisa chawlh ni a huam lo a; January 24, 2019 aṭanga ni 60 chhung atana tih niin, thupek zawm loa thil zuar luite chu dan anga hrem an nih tur thu tarlan a ni bawk.

Tarlan tawh angin, District Ma­gistrate order chu February 1, 2019 (Zirtawpni) khan police-in an zawhzui a, Raj Bhavan north gate traffic point leh Tennis Court traffic point inkar kawngpui sîr footpath-a serthlum zuarte chu zuar tawh lo tur leh chhuak turin an ti. Mahse, Mizoram sor­kara thuneihna changtu MNF party-a hotu lu pakhatin Home Minister leh AMC hotute biain, serthlum zuarte chu footpath-a inzawrhtir tura a hrilh angin serthlum zuarte chu police-in an hnawtdarh thei ta lo nia thu dawn a ni. 

Tennis Court bul footpath-a serthlum zuarte chuan, Tennis Court Thei Zuar Association tia an din thu leh, AMC aṭangin thil zawrh phalna an neih thu Vanglaini palai an hrilh a; an vaiin mi 14 an nih thu te, an serthlum zawrhte chu East Lungdar lama tharte a nih thute an sawi.

An pawl president Lalfakmawii, Nursery Veng sawi danin, kum dangah chuan Chief Secretary Bangla chhakah kawngpui sira footpath-ah serthlum an zuar ṭhin a, kuminah erawh phalsak an nih loh avangin tuna an zawrhna Tennis Court bulah an zuar ta a ni. Serthlum a rêm hnuah Ṭhuampuiah dawnfawh an zuar leh 

ṭhin a, chumi zawhah lakhuihthei an zuar leh ṭhin bawk. 

Serthlum zuartute hi a thartute an ni lo a, a thartu (serthlum huan neitu)-te'n mi tute emaw hnenah serthlum sên lai aṭangin a hralh a, a leitute chuan Aizawla kawngpui sira zuartute hnenah an pe chhâwng leh a ni. 

Lalfakmawii chuan, serthlum an zawrhte chu Mizoram ngeia thar a ni tih sawiin, "Kan ram ngeia thar a nih avang hian sorkarah pawh zawrhna hmun kan dil ngam a, kan ngampa ve a ni," a ti. 

Tennis Court bul footpath-a serthlum zuar mek mi 14-te hi AMC chuan November 15, 2018 khan inzawrh phalna, temporary license a pe a, license chu thla li chhung atana pek niin, March 15, 2019-a tawp tur a ni. License fee atan serthlum zuartute chuan thla tin AMC-ah Rs. 250 an pek a ngai ve thung. 

Serthlum zuartute chu AMC chuan identity card a siamsak a; AMC-in terms & conditions a siam angin ID card chu serthlum an zawrh­naah an awrh ngei tur a ni a, license chu mi dang hnenah hawhtir emaw, hralh emaw phal a ni lo bawk.

Aizawl District Magistrate (DC) office-a hotute chuan, footpath-a thil zawrh phal lohna thupek District Magistrate-in January 24, 2019-a a chhuah chu sût a la nih loh thu leh a la nun reng thu an sawi. Hetih lai hian, Tennis Court sir footpath-ah hian nimin thleng khan serthlum an la zuar a ni. 

Cr.PC 144 hmanga District Magis­trate-in order a chhuah leh AMC order hi a inkalh a; District Magistrate order aia AMC order anga thil a kal zawk chungchanga Vanglaini palai zawhna chhangin, District Magistrate office-a hotute chuan, an hriatthiam bik loh thu leh, Cr.PC 144 hmanga District Magistrate-in order a chhuah chu AMC order ai chuan a lal zawk tura an ngaih thu an sawi.

District Magistrate order leh AMC office order a inkalh chungchangah hian, khawi order nge lal zawk, tih zawhna chhangin dan hremi pakhat chuan, District Magistrate order a chungnung zawk tura a ngaih thu a sawi a, "District Magistrate-in chhan ṭha tak neia Cr.PCC 144 a puan chuan, licence an nei emaw nei lo emaw, District Magistrate hi specially empowered (a bik taka thuneihna pek) a ni a, hei hi ama jurisdiction (thuneihna huam chhung)-ah chuan a thu ber tur a ni," a ti.

Dan hremi pakhat chuan, mipui punkhawm pawh tuma'n an khap thei lo a, mahse, District Magistrate chuan vantlang himna leh thil pawimawh bikah chuan a khap hmak thei tih a sawi a; chutih rualin, Cr.PC 144 chu englai pawha hman tur a ni lo a, hun bituk neia hman ṭhin a nih thu a sawi bawk.