BADP atan sorkar laipui pawmpui turin Cheng nuai 5,367 thlen remtih a ni

State Level Screening Committee on Border Area Development Programme (BADP) chu nimin khan an chairman Lalnunmawia Chuaungo, chief secretary hoin Secretariat conference hall-ah an ṭhukhawm a; kum 2019-20 chhunga BADP hnuaia hna thawhna tura sum ruahman cheng nuai 5,367 chu sorkar laipui pawmpui tura thlen an remti.

Meeting-a tarlan danin, Mizorama RD block 26 zinga block 15 - Ngopa, Champhai, Khawbung, East Lungdar, Hnahthial, Bunghmun, Lungsen, Siaha, Tipa (Tuipang), Sangau, Lawngtlai, Bungtlang South, Chawngte, West Phaileng leh Zawlnuam-te hi BADP huam chinah an awm. Heng RD block zawng zawng hnuaia kum 2019-10 chhunga hna thawhna tur sum ruahman chu cheng nuai 5,183 a ni a; central share cheng nuai 4,646 leh state matching share cheng nuai 537 a ni.

Modified Guidelines of BADP, June 2015-in a phal angin, BADP hnuaia hnathawh vil zuia endikna atan cheng nuai 50 dah a ni a, Modified Guidelines of BADP, June 2015-in a phal ang bawkin ṭul bik leh project hmanhmawh thlak awm thut thei dâwm nan SLSC Chairman-in a ṭul anga a hman turin cheng nuai 134 dah a ni bawk.

BADP guidelines-ah chuan, BADP hnuaia project siam reng reng India ramri aṭanga km. 10 huam chinah thawh tur a ni a, Ministry of Home Affairs-in rua­hmanna thar siamin tlemin a thlahdul hret a, ramri aṭanga khaw hnai ber aṭanga chhiara km. 10 huam chhungah BADP hnuaia project-te kalpui theih a ni tawh.

Meeting chuan, BADP hnuaia capacity building emaw, skill development training buatsaih a nih dawn reng rengin bialtu MLA-te hriattir a, MLA hriatpuia huaihawt tur a nih thu sawilan a ni a; State Level Screening Committee-in project a pawm tawh reng reng kaihher emaw, pawhpên emaw a nih lohna turin a ṭul anga ṭan khawh tur a nih thu BDO-te hrilh an ni bawk.