Ni 365 chhungin Sports Policy kan beisei - Sports Minister

Sports & Youth Affairs (SYS) minister Robert Romawia Royte chuan nimin khan Mizo Hnam Runa inkhawmah thu sawiin, MNF sorkar ṭan aṭanga ni 365 (kum khat) chhungin Sports Policy an neih hman ngei a rin thu a sawi.

Robert Romawia Royte chuan, a department chan bikah MNF manifesto tihhlawh­tlin an ngai pawimawh tih sawiin, "Sports Policy-ah kan bung nghal a, kan sorkar 

aṭanga ni 365 ral hma ngeiin neih hman kan inring. Infiamna ruhrel duan kawngah sorkarin theihtawp a chhuah mek zel a, sorkar hmasain Olympic 2016 Vision, a thua thámral, a tak awm lo ang kha nih kan tum lo," a ti.

Sports Minister chuan, "Khawvel level-a infiamna hunpui lian Olympic a awm ang leh national levela National Games a awm ang hian, Mizoram State Games leh District Games neih theih dan tur kan ruahman mek a ni," a ti a; chu'ngte chu ṭhalai infiam mite tan a hlâwk dawn hlea an hriat thu a sawi.

Information and Communication Technology department chungchangah ICT minister Robert Romawia chuan, ICT chu department tê ni mahse a a pawimawh hle tih a sawi a, "Thawktu tlem mah ila, thawh chhuah len kan tum," a ti.

Tourism department chu Delhi-ah ṭum hnih a zin phah tawh tih sawiin, "Sum lokal lehna tura harsatna awmte kan sukiang mek a, international tourist map-ah Mizoram tarlan ve ngei kan tum," a ti bawk.

Robert Romawia Royte chuan, Citizenship (Amendment) Bill, 2016 (CAB) donaa NGO Coordination Committee-in hnam rilru pûa hma an lak dan chu ropui a tih thu a sawi a, "Mizoram hi kan vannei tak zet a, NGO Coordination Committee-in mipui min hûi khawm dan leh min kaihhruai dan a ṭha em em. India ram hmun danga awmte pawhin an zahin ka hria. NGO-te zarah North East rau rauah pawh kan hmalak dan a chhuanawm berin ka hria," a ti.

Minister chuan, CAB do tura Mizo mipui ṭanrual dan ropui a tih thu sawiin, "Chief Minister-in theihtawp a chhuahziate pawh hi a taka hmutu ka ni," a ti a; mipui 

ṭanhona leh kohhran ho ṭawngṭaina Pathianin a chháng nia a hriat thu a sawi a ni.