MZP-in CCE kalpui mek tihtawp an duh

MZP chuan nimin khan an Pisapui conference hall-ah Continuous and Comprehensive Evaluation (CCE) chungchang zirhona an buatsaih. MZP president L Ramdinliana Renthlei chuan, CCE chu system ṭha tak ni mah sem, Mizoramah an hman thiam loh avangin MZP chuan tihtawp mai ni se ṭha an tih thu a sawi.

MZP President chuan, CCE hi a theory chuan kalphung ṭha tak, mahse, a taka hman har tak si a nia sawiin, "A nihna ang tak hian hmang thei ila chuan a sytem hi a ṭha hle, mahse, Mizoramah chuan zirtirtu kan indaih loh bakah, zirlaite rilru-ah rah ṭha lo a tuh nasa a, a nihna ang takin kan hmang thei lo. CCE hi system ṭha tak a ni a, kan hmang thiam lo a, tihtawp mai ni se a ṭha a ni," a ti.

L Ramdinliana Ren­thlei chuan, Mizoram sikul hrang hranga admission fee leh private school monthly fee mumal lo lutuk chu veiawm an tih thu sawiin, "Sikul ṭhenkhatin admission fee leh private school monthly fee duh zat zat kan la emaw tih mai tur a ni a, private school ṭhenkhatah chuan an sikul building sak ṭhatna tur fee-te zirlai-ah an khawn a, school maintenance thlengin zirlaite'n an thawhsak a ni," a ti a; hostel awm man sorkar bituk aia sang an la deuh vek tih a sawi.

Private school-te fee lak danah sorkarin mumal takin dan a neihte kengkawh se, sorkar thu zâwm lote chu an school permit pawh titawp (cancel) ngam se an duh thu sawiin MZP President chuan, "Kan ram zirna hi siamṭhat a ngai a, khawpui leh thingtlang zirna inthlau lutukte hi siamṭhat a ngai hle. Kan ram zirnain hma a sâwn a, siamṭhat a nih theih nang i ṭangho ang u," a ti.

CCE seminar-ah hian Mizorama zirtirtu pawl 14 sawm an ni a, MSTA leh FMGST president Rosangzuala Ralte-in paper a buatsaih a sawi a, sawiho zui a ni.

Seminar-a telte chuan an sawihona aṭangin MZP-in sorkarah rawt­na lo siam se, an ti a; an point-te chu - 'CCE hi system ṭha tak a ni a, Mizoramah chuan a nihna tur ang taka kan hman theih loh avangin tihtawp a nih theih nan Mizoram sorkar­ah thlen ni rawh se,' tih leh, 'CCE hi hman chhunzawm a nih leh dawn chuan, ennawna siamṭhat ni rawh se,' tihte a ni.