Thingsulthliah khawtlangin Saitual dist.-a awm an duh lo

Thingsulthliah Village Council, tlawmngai pawl leh political party zawng zawngte chuan nimin khan chief minister Zoramthanga, bialtu MLA R Lalzirliana leh Chief Secretary hnenah lehkha an thehlut a, Saitual district-a awm an duh loh thu an thlen.

Thingsulthliah V/C, NGO leh political party-te chuan Chief Minister hnena an lehkhaah hian, Thingsulthliah khua chu Saitual district piang turah rîn luh a nih lohna turin theihtawpa hmalak chhunzawm zel an rel thu an tarlang a, "He mi chungchanga nang leh i cabinet minister Dr R Lalthangliana leh R Lalzirliana ten 'Saitual district-a Thingsulthliah khaw tel leh tel loh chu a khaw mipuite duhthlanna a ni ang' tia min lo tiam tawh chu lawmawm kan tiin, in-nghahna tlakah kan ngai," an ti.

Saitual district-ah Thingsulthliah telh a nih lohna atana Chief Minister, bialtu MLA leh Chief Secretary-te chu  theihtawp chhuaha hmalakpui turin Thingsulthliah V/C, NGO leh political party-te chuan an ngen a ni.