HSLC leh HSSLC topper-te hnenah ICT department-in lawmpuina a hlan

Information and Communication Technology (ICT) department chuan, nimin khan Vanapa Hall-ah kumina MBSE buatsaih HSLC leh HSSLC exam-a ti ṭha ber (topper)-te hnenah laptop leh lawmpuina certifcate an hlan. Laptop hi ICT minister Robert Romawia Royte-in zirlaite hnenah a hlan a ni.

Robert Romawia Royte chuan, tunlai khawvelah thiamna leh zirna ṭha neih hi thil hlu ber a nih thu sawiin, "Hlawhtling tur chuan hun âwl hman ṭhat leh ṭhahnemngaihna neih a pawimawh ber. Vawiina sorkar chawimawina leh laptop dawngtute pawh hian hun âwl an hman ṭhat vangin an zirlaiah mi dangte aiin hlawhtlinna an nei sang bik a ni," a ti.

ICT Minister chuan, thluak hmanga inelnaah Mizote ṭan thar a ngai tak zet tih sawiin, "Tih tak takna nun neih a, beihpui thlak a ngai. Taima, zir nasa leh mi hlawhtling nih tum hi a tlo ber a, ram tan pawh chung mite chu ro hlu an ni," a ti a; competitive exam hrang hrangah Mizo ṭhalaite hnam dangin min lehpelh mek zel avangin, tihtakzeta ṭhalaite'n zirnaah ṭan an lak thar a ngaih thu a sawi.

Inkhawmah hian ICT special secretary Sakshi Mittal-in inlawmna thu a sawi a, ICT secretary Amjad Tak-in zirlaite fuihna thu a sawi. Social Media Awareness Programme buatsaih nghal a ni a, informatics officer Lalengzuala'n zirlaite social media hman dan ṭha leh hman fimkhurna turte zirtir a ni.