KHAWTHLIR

Power & Electricity secretary H Lalengmawia hoin a pisaah nimin khan Power & Electricity department, IPR department leh Information & Communication Technology (ICT) department leh, bank leh Mizoram Consumer Union aiawhte'n digital payment chungchang an sawiho. Meeting-a tarlan danin, Aizawl khawpui hi India rama Smart City tur 100 thlan chhuah zingah a tel avangin pawisa fai hmang kher loa internet hmang ṭangkaia digital payment kalpui a ṭul a ni.

Minister K Lalirinliana chuan nimin khan a department chan, Local Administration Department pisa leh Fisheries Directorate a tlawh a, department-a thawktute nen department-in mamawh leh harsatna an tawhte bakah, hmalakna tur ṭul dangte an sawiho.

Pachhunga University College Teachers’ Association (PUCTA) chuan, nimin khan an college seminar hall-ah voluntary retirement-a zirtirtu hna chawlhsantu associate professor Dr R Lalthangliana, Department of Sociology leh associate professor Lalchamliana, Department of Political Science-te thlahna hun an hmang. An thlahte pahnih hi nikuma Assembly inthlanah thlan tlin niin, tunah hian Cabinet minister an ni ve ve a ni.

MZP headquarters, Champhai leh Champhai College Alumni Association chuan, nimin khan Champhai College-ah Champhai South bial aṭanga MLA atana thlan tlin, minister of state TJ Lalnuntluanga chawimawina an hlan. TJ Lalnuntluanga chuan hlawhtling tura kan mamawh ber chu dikna, rinawmna, taimakna leh Pathian ṭih a nih thu a sawi.

Aizawl West College chuan nimin khan Vanapa Hall-ah Annual Week khârna inkhawm an buatsaih a; khuallian, minister Lalruatkima chuan, zing boruak thianghlim hîp hman loa ṭhalaite an muhilh hlânin hnam dangte'n sumdawnna kawtthler lûnlaiah tûk tin sum an thawk chhuak chur chur ṭhin a hmuh chuan a rilru a tihnat thu a sawi. Inkhawmah hian AWC Alumni chuan an member MLA-a thlan tlin C Lalmuanpuia leh Lalrinsanga Ralte-te chawimawina thilpek an hlan a ni.