NIT chungchang Assembly session-a Sawite a dik tâwk lo - NIT Director

Tun hnaia Mizoram Assembly session-ah NIT-Mizoram Director chu thla khatah ni nga vel bak a office-ah a awm ngai lo nia an sawi chhuah chu a dik tâwk loh thu, National Institute of Technology (NIT) Mizoram director Prof. Rajat Gupta chuan a sawi. NIT Director chuan, NIT- Mizoramin permanent campus an nei lo chu an harsatna lian ber a nih thu a sawi bawk.

NIT-Mizoram Director hian nimin khan NIT hmunah thuthar thehdarhtute a kâwm. Assembly budget session neih zawh tâkah MLA ṭhenkhatin NIT Director chu thla khatah ni nga vel bak office-ah a awm ngai lo nia an sawi chungchang zawhna chhángin, "A dik tâwk lo. Programme kan ngah a, meeting leh conference kan telna tur tam tak a awm a, chuvang chuan kan zin chhuak tam hle. Kan faculty-te pawh hmun dangah nen an thawk a, Mizoramah an awm reng thei bik lo a ni," a ti.

Prof. Rajat Gupta chuan, hmun nghet an la neih loh thu sawiin, "Hmun nghet kan la nei lo hi kan harsatna lian ber a ni. Tunah chuan mi in luahin kan awm a, thil tam takah a buaithlak hle. Hostel pawh mimal in luahin kan la awm a, hostel leh class lakna hmun a inhlat avangin zirlaite'n harsatna tam tak an tawk a ni," a ti a; Lengpui rama NIT campus turah hna thawh mumal a la ni lo tih a sawi.

NIT permanent campus, Lengpui atan hian kum 2012 khan Union Human Resources Development minister Kapil Sibal-a'n lungphûm a phùm tawh. HRD ministry-ah DPR an siam a, March 2018-ah revised estimate an thehlut a, tun thlengin MHRD-in a la pawm lo. Tun aṭanga thla hnih/khat chhungin an pawm theih an beisei. 

Hun rei tak chhung chu campus tur panna kawng a chhiat lutuk avangin harsatna an tâwk a, tunah erawh chuan kawng chu a ṭha pangngai tawh. A panna kawng siam, power supply leh water supply-te chu Mizoram sorkar buaipui tur a ni. Rajat Gupta chuan, "State sorkar hmalakna hi kan duhthusam ang vek ni lo mah se, hma an la ṭha a, min thawhpui ṭha hle," a ti.

NIT Director sawi danin, Lengpuia NIT campus dinna tura DPR an siam chu a vaiin cheng vbc. 1,282.14 hû a ni a, December 2017 thleng khan cheng vbc. 135 hman a ni tawh. MHRD-in a pawmpuinaa ranking siam ṭhintu National Institutional Ranking Framework (NIRF)-in NIT ranking a siamah NIT-Mizoram hi a lang lo. Hemi chungchangah hian Prof. Rajat Gupta chuan, "Zirtirtu kan tlem a, zirlai kan tlem a, publication kan nei thei lo a, chuvangin NIT ranking-ah hian kan lang thei rih lo. Lang pha tur chuan kum thum vel tal nghah a la ngai ang," a ti a; ranking-a lang turin hmasawnna tur tam tak an la neih thu a sawi.

NIT Director chuan, NIT-ah hian Mizoramin seat awm zawng zawng aṭanga a zatve (50%) a nei tih sawiin, "Seat 50% hi a vaiin seat 75 a ni a, hei hi Mizorama zirlaite'n an luah khat lo nasa hle. A chhan ber chu JEE (Joint Entrance Examination) paltlang thei zirlai an tam loh vang a ni," a ti a; NIT zingah NIT-Mizoram chu zirlai leh zirtirtu tlemna ber a nih thu leh, Mizo zirlai tam zawkin JEE an paltlang theih nan NIT-Mizoram chuan coaching an kalpui thu a sawi.

Prof. Rajat Gupta sawi danin, NIT-Mizoramah hian din ṭan tirh lamah chuan Mizoram aṭangin zirlai an tlem hle a, Mizoramin seat 75 a neih aṭangin zirlai 20 pawh an tling ngai lo. Kum 2015-16 aṭangin Mizo zirlai an pung a, kum tin 30 chuang an lut thar ziah tawh. Kum 2019-20 aṭanga lut thar tur tan counselling tih mek a ni a, counselling round-1 ah Mizo zirlai 66 an inlan a, counselling hi round thum neih a ni dawn.

NIT-Mizoram hian July 4, Ningani hian Mizoram University auditorium-ah convocation vawi thumna an hmang dawn a, All India Council for Technical Education (AICTE) chairman Prof. Anil D Sahasrabudhe chu khuallian a ni ang. NIT-Mizoram hian kum 2015 leh 2018-ahte convocation an lo nei tawh a ni.

Building sakna atana sum ruahman    - Vbc. 703 vel

Ram/leilung sawngbawlna atan     - Vbc. 396 vel

December 1, 2017 thlenga sum hman