In pali chhiaah mi pahnih an thi

Durtlang Veng chuan hnuai lama mirethei chenna in tia hriat Basic Service to Urban Poor (BSUP) building pali chhawng li ṭheuh chu nizan dar 6 vel khan a chhia a, hriat theih chinah mi pahnihin nunna an chan.

Chhiatna a thlen velah chhan chhuah hna thawh nghal a ni a, helai hmuna chengte hnen aṭanga thudawn danin Lalnunfeli (13) d/o Lalngaihliani leh Sainghinglovi (58) w/o VL Rodawngate chu thia lak chhuah an ni. 

He thuziah lai hian mi pasarih chu hliam tura lak chhuah an ni a, damdawi-in panpui nghal an ni. Hriat theih chinah lak chhuah loh mi pali an awm. Chhiatna thlenna hmunah hian building panga a ding tlar a, building chhe lo awm chhun pawh a chhak zawngin a awn a ni.

Chhan chhuah hna hi a nawlpuia thawh a nih hnuah training chhuak­te'n building chhung luh chilhin chhan chhuah hna an thawk a ni. Building chim chhan tak hi hriat theih a ni loa, chhak lam aṭangin lei a min (tawlh) deuh a, hei hian building chhawng hnuai ber a nawk a, a chhawng hnuai ber hi tlusawp a, a chung lam erawh tlusawp loin, a awn zui a ni. 

Chhiatna thlenna hmunah hian minister Lalchhandama Ralte, dy. speaker Lalrinawma, bialtu MLA Vanlalhlana, AMC mayor PC Lalhmingthanga, dy. mayor Lalring­liana, UDPA secretary Dr C Vanlal­ramsanga, IGP LH Shanliana, UDPA director Joseph H Lalramsanga bakah Central YMA hruaitute an president Vanlalruata hoin an awm a ni.

Durtlanga BSUP complex-ah hian in (building/block) 20 a awm a, building pakhat chu chhawng li zel niin, building pakhatah chhungkaw 16 zel an awm thei a, a vaiin chhungkaw 320 awmna tura sak a ni. Building tinah in ruak (luah loh) eng emaw zat a awm a, luah mektu chhungkaw zat he thu ziah lai thleng hian hriat theih a ni rih lo.