KHAWTHLIR

Doctors' Day, July 1, 2019 khan Indian Medical Association, Mizoram huaihawtin Mizoram district tinah doctor-te'n thisen an pe a, an thisen pek belhkhawm chu unit 82 a ni. Thawhṭanni vêk khan Kelkang Bial KṬP-te'n Champhai District Hospital tan thisen unit 34 an pe a, a petute mipa 30 leh hmeichhia pali an ni.

Mizoram State Rural Livelihood Mission (MzSRLM) hnuaia BMMU, Siaha RD Block chuan an huam chhunga self help group (SHG)-te tan nimin khan Siaha BRC Hall-ah Financial Inclusion Training an buatsaih a, district 

bawrhsap Bhupesh Chaudhary-a'n a hmanpui. Tun dinhmunah Siaha RD Block chhung-ah hian SHG member 2,116 an awm a ni.

Mamit SP Shashank Jaiswal chuan thupek chhuahin, Bairabi leh Teirei lei inkar kawng chhe zual lai chu cement concrete pavement-a siam tum a nih thu leh, kawng siamṭhat hna chak taka thawh zawh thuai a nih theih nan July 1-31, 2019 chhung lirthei tlân phal a nih dawn loh thu a tarlang.

ZPM ṭhalaite chuan Indian hockey player Lalremsiami chu a pa Lalthansanga Zote-in June 26, 2019-a a thihsan avanga an tawrhpuizia lantir nan nimin khan Kolasib-a an inah an rál a, ZPM ṭhalai president Malsawmzuala'n ralna thilpek a hlan. Mizoram leh India ram tan theihtawp chhuah zel turin duhsakna an hlan a ni.

MLA Andrew H Thang-liana chuan a bial, Tuirial constituency huam chhunga Kawnpui College-ah nimin khan Computer Study Centre a hawng. Andrew H Thangliana chuan, sorkarin computer thiam a mamawhna a sang zel tih sawiin, “Tuna college behchhana computer zirna hi ṭhalaite’n an ṭangkaipui dawn a, hmasawnna chhin-chhiah thlak tak a ni,” a ti. Kawnpui College hi private college a ni a, computer study centre-ah hian Kolasib aṭangin NIELIT instructor-te a inchhâwka kalin compu-ter an zirtir ṭhin dawn a ni.