V/C-te hnenah cheng vbc. 45.44 sem

LAD minister K Lalrinliana chuan nimin khan a pisaah Indian Constitution 6th. Schedule-in a huam loh village council-te hman tur sum cheng vbc. 45.44 a sem a; district paruk - Aizawl, Lunglei, Champhai, Ser­chhip, Kolasib leh Mamita LAD officer-te'n an district chhunga V/C-te aiawhin an dawng.

K Lalrinliana chuan, Mizorama thing­tlang khuate hmasawnna hnathawhna tur sorkar laipui aṭanga sum lo kalte chu a thlenna tur dik taka a thlen a pawimawh thu a sawi a, hmasawnna ruhrel ṭha leh rintlak, mipuiin ṭangkai taka an chhawr theih din tur a nih ngei theih nan fimkhur turin DLAO-te a chah.

14th. Finance Commission chuan Panchayati Raj nei ve lo, Non-Part IX Area-a awm state pathum - Mizoram, Meghalaya leh Nagaland-ahte rural local body (village council)-te tan sum a dah lo a; 14th. Finance Commission chuan sorkar laipuiah rawtna siamin, state pathuma village council-te'n ṭanpui an ngai hle a, anmahni dâwm kânna tur ṭanpuina pe turin a ngen a ni.

14th. Finance Commission rawtna bawhzuiin Mizoram sorkar chuan Ministry of Panchayati Raj hriatpuiin Ministry of Finance-ah dilna a thlen a, 6th. Schedule-in a huam loha V/C-te’n an khaw hmasawnna hna an thawh theih nan cheng vbc. 45.44 a pe ta a ni.

District            V/C zat    Sum pek zat

Aizawl            95            Nuai 786.78

Lunglei        143            Nuai 1,170.31

Champhai    108            Nuai 902.30

Serchhip        49            Nuai 459.98

Kolasib        52            Nuai 582.52 

Mamit            87            Nuai 642.11

Total            534            Nuai 4,544.00