Industry hmasawn dan tur sawiho

Industrial Development Board chu nimin khan a ṭum khatna atan Commerce & Industries minister Dr R Lalthang­liana hoin an ṭhukhawm a; Mizorama industry hrang hrang hmasawnna atana hma lak dan tur leh ṭhalai hna nei lote tan eizawnna ṭha siamsak dan tur an sawiho.

Dr R Lalthangliana chuan, "Kan ram chhunga thil kan thar chhuahte hi hlut thiam ila, ram páwna mi lak luh ngai loa kan ram chhung aṭang ngeia kan siam chhuah thilte chawi sang thiam ang u. Ṭhalai lehkha thiam tam tak, hna thawh tur fumfe nei si lote hmakhua hi Industrial Development Board hmangin chak zawka an hna ngaihtuahsak hi a tum pawimawh tak pakhat a ni,” a ti.

Commerce & Industries secretary R Lalramnghaka chuan, PMEGP diltute'n bank nena an indawrna kawnga harsatna awm ṭhin leh an harsatnate sutkian theih nan sorkar lama hmalakna awmte a tarlang a, "Margin money ringawt beiseia loan diltu an awm ṭhin," a ti a; loan dil chung­changa inzirtirna buatsaih a ṭul thu a sawi.

Commerce & Industries director J Hming­thanmawia tarlan danin, Mizoramah industrial unit inziak lut 9,196 an awm a, chung zinga 6,862 chu manufacturing unit a ni a, 6,862 chu servicing unit 2,334 a ni.