Champhai vawn him dan tur rêl

Law & Judicial minister TJ Lalnuntluanga hoin nimin khan Champhaiah sorkar official, tlawmngai pawlte leh khawtlang hruaitute'n Champhai khawpui chhung leh leilet záwl vawn hima enkawl zel dan tur an rêl.

TJ Lalnuntluanga chuan, Champhai khawpui leh a chhehvel chhiat zel lohna atan leh, nakin zela harsatna awm theite pumpelh a nih theihna tura zau taka inràwn khawmna hun siam a ni chu lawmawm a tih thu a sawi a, "Khawpui rem fela cheibâwl hna chu a bul ṭanna mai a la ni," a ti.

Mithiam leh mi ṭha-hnemngaite chu Champhai khawpui master plan leh leilet vawn hima tihchangtlun tumna kawngah ṭhahnemngai taka hotute ṭawiawm a, thurâwn pe zel turin a sáwm a ni. Line department hrang hrang hotute'n khawpui chhung cheibâwl hna kalpui dan tur leh leilet hmun vawn hima tihchang-tlun dan tura hmalakna hrang hrangte an tarlang.

Champhai khaw-tlang hruaitute leh tlawmngai pawl hruaitute pawhin ngaihdan leh duh dan an neihte leh an ngaihmawh zawngte an sawi bawk.