Mosolman inkhawmpuiah Saiphaia mi tel loah ngai
Saiphai VCP Lalramnghaka chuan, tun hnaia Delhi-a Mosolman ho inkhawmpuiah Saiphaia khawsa mi pakhat a tel vea sawi chu a tel lo nia an hriat thu leh, chu vang chuan khung hran (quarantine) a nih loh thu a sawi. Vanglaini palai zawhna chhangin Lalramnghaka chuan, an khuaa Muslim pakhat, Delhi-a inkhawmpuiah a kal vea sawi thawm an hriat veleh an ngaihven nghal tih a sawi a, "Delhi-a kal turin nikum October 28 khan Silchar aṭangin rêlin a chhuak a, January 8, 2020 khan Saiphai a lo thleng leh niin a insawi a. Khuaa kan hmuh dante chhûtin, a sawi hi a dik theiin kan hria, Mosolman inkhawmpuiah chuan a tel lo niin a lang. Amah pawh a hrisel ṭha. Saiphai aṭangin mi dang pawh an kal loh thu a sawi," a ti.