In chima thi 3 la chhuak kim A chhuitu tur din a ni dawn

Durtlang Leitan mawng lama mirethei zawkte chenna in (BSUP - Basic Service to Urban Poor) 20 zinga pathum, July 2, Thawhlehni tlai dar 6 pelh hreta lei leh lung tawlhin a tihchhiatah mi pathum an thi a, mi 11 an hliam. He vanduaina tawk thi tate chu Mizoram sorkarin Rs. 4,00,000 ṭheuha a ràl dawn thu leh thil thlen dan chhuitu tur committee din a nih tur thu, chief minister Zoramthanga'n a sawi.

BSUP Complex-a chhiatna thlenga thite zinga pahnih - Sainghinglova (52) w/o V Lalrodawnga leh Lalnunfeli (13) d/o Lalngaihliani te chu Thawhlehni zanah lak chhuah an ni a, Lalpeksanga (8) s/o Lalchuailova chu nimin zing dar 7 vel khan lak chhuah ve leh a ni.

Hliam zinga pathum chu Synod Hospital-ah admit an ni a, pariatte chu first aid pek hnuah chhuahtir leh nghal an ni. Chhiatna thlenna hmun hi CM Zoramthanga chuan nimin zing khan a tlawh a; vanduaina tuarte chu sorkarin ṭanpuina dan pangngai a neih angin a ṭanpui vek tur thu sawiin, "Mitthite hi cheng nuai li ṭheuh pek tur an ni a, hliamte, taksa che thei tawh lo leh rualbanloa awm mai turte chu nuai hnih thlengin ṭanpui theih a ni. A dangte chu an hliam nat dan azir zelin kan ti ang," a ti.

'Sorkarin a chhui chiangtu tur inquiry committee emaw din a tum em?' tih zawhna chhangin Chief Minister chuan, "Kan din ang. Tun hnu zelah pawh kan tih tur leh kan tih loh tur kan hriat theih nan a ṭul angin eng nge enfiah ngai, enfel ngai tihte chhui turin inquiry committee kan siam ang," a ti a; thil tisual an awm chuan dan anga kalpui mai tur a nih thu a sawi.

Zoramthanga chuan, vanduaina thleng chu pawi a tih thu sawiin, "A pawi ta ber chu, he lai hi pialtlêp hmun a ni a, tui a tam si a, pialtlêp chu a rawn tawlh ta a, building eng anga ṭha pawhin a dâwl zawh rual a ni si lo a, a chhe ta a ni. Heng chhiat tawhna hi keini pawh fimkhur lehzualna kan hman a ṭha a, kan in sakna tur hmunte fimkhur takin kan en a ngai. Mitthi chhungte leh hliamte kan tuarpui tak zet a ni," a ti.

Chhiatnaa chhan­chhuah hna thawktute fakin Zoram­thanga chuan, "Kan disaster management lama thawktute an fakawm a, fel takin an hmanrua nen an rawn thawk chhuak a, kan theih ang tâwka sorkar lam kan lo inbuatsaih lâwknate a takin a lang. Zan hrehawm takah thimtham karah an bei a. He lai Durtlang leh a chhehvel YMA leh mipui mi zawng zawng theihtawpin an ṭang khawm a, a ropui ka ti a, hnam dangin an entawn tlak khawp a ni," a ti. Chief Minister chuan chhiat tawkte chu ṭawngṭaipui turin kohhrante leh mipuite a sáwm.

Chief Minister hian nimin zing vêk khan hliam zinga Synod Hospital-a enkawlte chu a tlawh a, BSUP Complex-a cheng chhungkua eng emaw zat awm khawmna Durtlang MC Hall leh mitthi pahnih dahna Leitan YMA Hall-te a tlawh bawk.

Chhiatna thlenna hmun hi Disaster Management & Rehabilitation (DMR) minister Lalchamliana'n nimin zing vêk khan a tlawh a; minister dang - Dr R Lalthangliana, K Lalrinliana, Lalchhandama Ralte leh Lalruatkima te, MLA eng emaw zat, AMC mayor PC Lalhmingthanga, chief secretary Lalnunmawia Chuaungo, UDPA secretary Dr C Vanlalramsanga, Home secretary Lalbiakzama leh sorkar officer ṭhahnem takin an tlawh bawk a ni.

Chhiatna thlengah hian National Disaster Response Force (NDRF) leh State Disaster Response Force (1st. MAP, 3rd. MAP leh 5th. IR) mi eng emaw zatin Thawhlehni zan khan zankhuain chhanchhuah hna an thawk a; Assam Rifles leh BSF sipai eng emaw zatin an pui bawk.

BSUP Complex-ah hian in (building) 20 a awm a, building pakhat chu chhâwng li zel niin, building pakhatah chhungkaw 16 zel an awm thei. In 20-ah chhungkaw 320 an awm thei a, mahse, building tinah in ruak (luah loh) eng emaw zat a awm. Lei leh lung tawlh hian building ding tlar chhak bera building panga zinga pathum a delh.

Complex-a chengte sawi danin, building pathumah chuan chhungkua 18 an chêng a, in pathumte chu a chhâwng hnuai ber ṭheuh a sawp chhe vek a, mitthi leh hliamte chu in chhawng hnuai bera awm vek an ni. Complex pumpuiah chhungkaw 130 vel an awm mek a, an vaiin chhuahtir rih niin, complex bula camp-ah leh Durtlanga MC Hall-ahte awmtir phawt an ni.

Nimin vêk khan chief minister Zoramthanga hoin a pisaah chhiatna a thlen hnua hmalak zui dan tur sawiho a ni. Meeting-ah hian mithiamte chuan, BSUP building structure chu a ngheh ṭhat thu leh a ngheh avangin pialtlêp lian takin su mah se, a chhiat tlem zawk thu an sawi a, "Technical negligence a awm thei em tih zir chian ni se," an ti.

Meeting-ah hian, BSUP Complex building danga awmte pawh fûrin a nan dawn avangin an him zawk nan ramchan dan ang zela sawn chhuah dan tur ruahmanna siam chungchang te, venhim hna thawk tura ṭanrualte leh a hmun pumpui chîk taka enfiah a, a hlauhawm dan zir chiante an rêl a ni.