KHAWTHLIR

Kolasib DC Zoengsanga chuan nimin khan Kolasib District Jail a tlawh a, a dinhmun a enfiah. DC chuan, jail-a doctor duty tur an awm theih nan hmalak a nih tur thu a sawi a, "Harsatna dang awmte pawh chinfel a nih theih nan hmalak dan tur kawng dap a ni ang," a ti. Kolasib District Jail hi mi 114 tân theihna a ni a, mi 135 an táng mek. Thawktute sawi danin, tunlai hi táng an tlem lai a ni a, a tlangpuiin mi 160-170 inkar an awm ṭhin a ni.

MIRSAC leh Champhai DC office ṭangkawp chuan nimin khan Champhai DC conference hall-ah khuarel chhiatna laka Champhai dinhmun an zirho a, Champhai khawpuia V/C, YMA, MUP leh MHIP aiawhte an tel. MIRSAC scientist-te'n Hazard Risk and Vulnerability Analysis leh Digital 3-D Terrain Mapping & Modelling chungchang a lem nen an sawifiah a; lirnghing, leimin leh thlipui laka chhiatna thleng thei laka Champhai dinhmun zir chianna thlirho a ni.

Mara Autonomous District Council-a MDC hlui V Lalchhawna lehkhabu ziah, 'Rambuai leh kei' (Pathian min hruaina) tih chu nimin khan MZP conference hall-ah minister of state Dr K Beichhua'n a tlangzarh. Lehkhabu ziak-tu hi MNF-ten zalenna an sual dawna signatory zinga mi a ni a; rambuai inṭan dan te, hun harsa tak Mizoramin a hmachhawn dante a ziak a ni.

Aizawl District Level Committee on Child Labour chu nimin khan district bawrhsap Vanlal-ngaihsak hoin an ṭhukhawm a; hun tiam neia Aizawl district pumpui tuam chhuaka hna thawhna hmun him lo laia naupang kum 14 tling lo chhawr an awm leh awm loh zawn chhuah an rel. Meeting-ah hian department hrang hranga official-te bakah, YMA leh MHIP aiawhte member an ni.

Asia ram hrang hrangah vawk natna - African Swine Fever (ASF) a lêng mek tih hriat a nih avangin Aizawl DC chuan, Aizawl District Magistrate phalna la hmasa loa vawk, vawksa leh vawksa aṭanga siam reng reng district páwn lam aṭanga Aizawl district chhunga lak luh khap a nih thu a puang. Vawk hri léng vanga mipuiin buaina leh harsatna a tawh loh nana AH&Vety Secretary lehkha bawhzuiin thupek hi chhuah a ni.