International Biodiversity Day hman a ni

Mizoram State Biodiversity Board buatsaihin nimin khan Champhaia IPR auditorium-ah  International Biodiversity Day hman a ni a, Environment, Forests & Climate Change (EFCC) minister TJ Lalnun-tluanga'n a hmanpui. Day thupui chu 'Our biodiversity, our food, our health' tih a ni.

TJ Lalnuntluanga chuan, nungcha leh ramngawte humhalh kawngah ṭan lak thar a ngaih thu sawiin, "Champhai Master Plan tun hnaia tharthawh mek pawh biodiversity venhimna tura ṭangkai tak tur leh hemi kawnga hmalakna pakhat a ni. Sava leh nungchate nasa taka suat a ni ṭhin a, a veiawm hle. Home department bultumin Arms Act ennawn mek a ni a, airgun pawh mumal leh felfai zawka license siama khuahkhirh tum a ni," a ti.

Forest Minister chuan, nungcha, thing leh maute chu Pathian malsawmna min pek a ni tih hriat thar a ngaih thu sawiin, "Hengte kan tihchereu leh zel chuan a tuartu tur chu keimahni bawk kan ni. Ramngaw kan neihte ram dang mite'n min humhalhsak dawn lo a, keimahni ngei kutah a innghah tlat avangin mi tinte'n kan mawhphurhna kan hlen a ṭul," a ti a; thing phun tam aiin phun nun tam tum a nih thu a sawi.

TJ Lalnuntluanga chuan, green park a tam thei ang ber siam tura ngaihtuahna sên a nih thu leh, nakin zela ram hmasawnna ngaihtuah chunga ramngaw leh nungchate hunhalh a ngaih thu a sawi a; a tlai hmaa biodiversity humhalh kawnga ṭan la thar turin kalkhawmte a chah.

International Biodiversity Day hawnna inkhawmah hian conservator of forest C Vanlalena, Champhai DFO C Lalbiaka leh honorary wildlife warden PC Rosiama te pawhin thu an sawi. Chawhnu lamah technical session neih a ni a, Aizawl Forest Division-a ACF Rongura Hrahsel leh MSBB-a technical assistant Dr Lalneihpuia Chhakchhuak ten BMC-te thil pawimawh hrang hrang an zirtir a ni.