Political party-te'n chhiatna thleng pawi an ti

Lei leh lung tawlh vanga Durtlang Leitan mawng lama BSUP (Basic Service to Urban Poor) complex-a in pathumte chimah mi pathum an thi leh hliam an awm nual chu pawi an tih thu political party-te'n thuchhuah siamin 

an tarlang.

Rorel lai MNF party chuan, mitthi leh hliamte an tawrhpuiin pawi an ti tak zet tih sawiin, "Mitthi chhungte Pathianin thlamuana awmpui turin a duh tak zet a, hliamte pawh ṭha chhuak leh thuai turin a duhsak em em a ni," an ti a; Chief Minister, minister leh MLA-te'n chhiatna hmun an pan thuai chu lawmawm an tih thu an sawi.

MNF chuan, chhiatna thleng chu mihringte siam chawp chhiatna (man-made disaster) a nia sawiin, "Contractor inthlahdah leh uluk loh vang te, a hun laia sorkar, Congress sorkar inthlahdah vang leh an enpuia an vil uluk tâwk lo ni theia a lan avangin MNF chuan a mawhphurtute an phu tâwk hremna pek hial tlakah a ngai," an ti.

Mizoram Pradesh Congress Committee (MPCC) chuan, "He chhiatna thlenga nunna chan mi pathum an awm leh hliam tuar mi eng emaw zat an awm te, thlaphâng taka an chenna in chhuahsan ngaia chhungkaw tam tak an awmte hi pawi kan ti tak zet a ni," an ti a; chhanchhuah hna thawktu zawng zawng leh zankhuaa hna thawktu Disaster Response Force mi leh sate huaisenna leh inpekna ropui an tih thu an sawi.

MPCC chuan, chhiatna tuartu zawng zawngte tana báng loa ṭawngṭai turin Mizoram mipui an ngen a, "He chhiatna rapthlak tak thleng denchhena thu belhchian dâwl lo hmanga inchirhthehna awm thei lakah inthiarfihlim turin mipui kan ngen a ni," an ti.

ZPM thuchhuah chuan, mitthite an lainat a, an chhungte an tawrhpui thu leh Pathian thlamuanin awmpui se an duh thu sawiin, "He chhiatna vanga hliam, damdawi-in leh in lama enkawlte pawh ṭha chhuak leh thuai turin duhsakna kan hlan a ni," a ti a; mitthi chhungte râlna leh hliam tuarte kanna leh chhawmdawlna sum ṭhahnem tak pe ngei turin sorkar an phût a ni.

ZPM chuan, vanduaina lian a thlen chánga chhawmdawlna awm thei ang ang bawhzuia hmu ve thei tura ngaihtuahna hmang turin sorkar an phût thu leh chhanchhuahna leh chhawmdawl hna thawktu zawng zawngte inpekna ropui an tih thu an tarlang a, "BSUP building sakah hian thil fel lo a awm leh awm loh chhui chiang turin sorkarin enquiry commission a din ngei kan a phût a ni," an ti.

PRISM pawhin thuchhuah siamin, "BSUP building ṭhenkhat chim vanga nunna hlu tak pathum chân a ni chu pawi kan ti a, thihna tâwk chhungte kan tawrhpui tak zet a, hliam eng emaw zat an awm chu pawi kan tiin, in chim vanga chenna mumal nei loa awm mekte kan lainat tak zet a ni," an ti a; building-te chu a sak a ṭha tâwk lo nia an hriat thu an tarlang.