Sorkar-in thumum a neih hunah Lokayukta kalphung tihfel a ni ang - C Lalsawta
Mizoram Lokayukta chairman C Lalsawta, IAS (Rtd.) chuan, sorkarin Lokayukta kalphung tur a tihchian veleh Lokayukta kal zel dan turah ruahmanna tihfel a nih tur thu a sawi. Lokyukta hian a taka hna a thawh tirh aṭangin complaint pasarih an dawng tawh.
Vanglaini palai zawhna chhangin C Lalsawta chuan, Lokayukta kalpui a nih dan turah thil tihfel ngai a la awm thu a sawi a, "Ruahmanna ṭhenkhat chu ka siam tawh a, mahse, sorkarin engtiang chiahin nge Lokayukta hi kalpui a duh ka la hre lo. Sorkarin ruahmanna a siam veleh kan kalphung tura ruahmanna neihte kan tifel ang," a ti a; ruahmanna an neihte chu sorkarah an thlen tur thu a sawi.
Lokayukta Chairman chuan, complaint an dawnte chhui chiang turin ACB hnena a thawn zelna chhan zawhna chhangin, "Directorate of Enquiry ka la nei lo a, ka neih hma chuan ACB bakah, CBI-te chhuitir pawh phalsak kan ni. Directorate of Enquiry kan neih hnuah pawh thubuai azirin CBI-te pawh kan la pun thei tho," a ti.
C Lalsawta chuan, Directorate of Enquiry atan post ṭhenkhat lak phalna an neih tawh thu sawiin, "Mahse, sorkar policy kan hre lo a, ACB-te hi kan ring tlang dawn nge dawn lo kan hre lo. Kan rin tlang dawn chuan post hnawhkhah kher a ngai chuang lo a ni," a ti a; Directorate of Enquiry-te mamawh tur an la neih loh thu a sawi.
Court-a thubuai thehluh a nih huna a buaipuitu tur ukil rawihna an neih tawh thu sawiin C Lalsawta chuan, "Sorkar chuan tun budget-ah khan thuhretute TA/DA tur leh ukil rawihna turte min pe. Court thubuai a awm a nih chuan public prosecution ang deuhin ukil kan ruai ang a, anni'n Court-a buaipui ngaite an buaipui ang. A ṭul ang zelin keini pawhin kan pui ang," a ti.
Lokayukta Chairman sawi danin, Lokayukta hian complaint pasarih an dawng tawh a, chung zinga panga chhui zui turin ACB-ah an thawn tawh. ACB hi thla ruk chhunga chhui zo tura tih an ni a, an chhui zawhah an thil hmuh chhuahte Lokayukta-ah an thehlut dawn a ni.
Thubuai pakhat chu ACB-in an chhui zawh tawh, Lokayukta-a complaint lut thar leh a ni. Hei vang hian Lokayukta chuan chhui belh tur a awm leh awm loh te, chhui zui kher a ngaih leh ngaih lohte leh, engtianga hmalak tur chi nge, tihte an zir chiang mek. Thubuai pakhat erawh chu Lokayukta buaipui chi a nih leh nih loh dan lam thiamte zir chian tir turin Law & Judicial department-ah an thawn thung.
C Lalsawta hi governor prof. Jagdish Mukhi chuan March 11, 2019 khan Raj Bhavan-ah rinawmna thu tiam tirin Mizoram Lokayukta chairman hmasa ber atan a la lut a ni.