NIT-Mizoramin convocation vawi 3-na an hmang Mizote'n NIT-a Mizoram quota an luah khat zo lo

National Institute of Technology (NIT) - Mizoram chuan nimin khan Mizoram University (MZU) Auditorium-ah convocation vawi thumna an hmang. NIT-ah hian Mizoramin seat a neihte Mizote leh Mizoram miin an luah khat zo lo hle ṭhin a, academic session thar 2019-20 ah erawh chuan an pun beisei a ni.

NIT-Mizoram director Prof. Rajat Gupta-a'n tun hnaia press meet a neiha a sawi danin, NIT-Mizoramah hian a awmna state a nih angin Mizoramin seat awm zawng zawng aṭanga a zatve (50%) a nei a, chu chu seat 75 a ni.

Chutih laiin, Mizote'n an luah khat zo lo hle a, kum 2014-15 ah phei chuan zirlai 11 chiah an awm. Kum 2013-14 ah Mizo zirlai 12 leh 2012-13 ah pawh zirlai 15 chiah an awm bawk.

Kum 2015-16 aṭang erawh chuan zirlai an pung hret a, mahse, Mizoramin seat a neih zat zatve pawh an la luah khat zo lo. Kum 2015-16 ah Mizo zirlai 37, kum 2016-17 ah zirlai 33, kum 2017-18 ah zirlai 37 leh kum 2018-19 ah zirlai 36 an awm a ni. NIT-a zir tur hian Joint Entrance Examination (JEE) paltlang a ngai.

Academic session thar 2019-20 atan erawh chuan zirlai an pun beisei a ni. JEE 2019 result a chhuah tawh angin, NIT-Mizoram pawhin an zirna-ina lut tur thlanna counselling an buaipui mek. Counselling round-1 kalpuiah zirlai 66 an inlan a, counselling hi round thum neih tur a ni a, chumi hnuah seat a la âwl a nih chuan open round neih leh an tum a ni.

Prof. Rajat Gupta chuan, Mizoramin NIT-Mizorama seat a neih angte hnawhkhat tur zirlai an awm loh chhan chu, JEE paltlang zirlai an tlem vang niin a lo sawi tawh. NIT-Mizoramah hian company-te'n recruitment (placement) an neih chilh ṭhin. NIT-Mizorama batch khatna (2010-2014) aṭangin zirlai 77%, batch hnihna (2011-2015) aṭangin 71%, batch thumna (2012-2016) aṭangin 52%, batch lina 2013-2017) aṭangin 48%, batch ngana (2014-2018) aṭangin 62% ten placement an hmu a ni.

An hriat chinah, NIT Mizoram aṭanga zir chhuak zinga hlawh ṭha berin kum khatah cheng nuai 17.30 (BPCL-ah) hlawhin, a dawttu-in nuai 10.03 (BEL-ah) a hlawh a; a hlawh hniam berin nuai 3.20 hlawhin, an hlawh chawh rual chu nuai 6.25 a tling.

NIT-Mizoram hian nimin khan MZU Auditorium-ah convocation vawi thumna an hmang a, All India Council for Technical Education (AICTE) chairman Prof. Anil D Sahasrabudhe chu khuallian a ni. Mi 90 hnenah degree certificate hlan a ni a; chu'ngte chu CE-ah mi 26, CSE-ah 12, EEE-ah 7, ECE-ah 13 leh ME-ah 16 an ni. M.Tech. zir zo mi 14 hnenah certificate hlan a nih bakah, a vawi khatna atan mi pahnih hnenah Ph.D. degree hlan a ni.