Zu khapna dan hnuaiah winery-te Ngaihnathiam tura hmalak a ni - TJ Lalnuntluanga

Champhai Grape Growers Society (CGGS) chuan, nimin khan Tlangsam Winery-ah general body meeting an nei a; an hun hmanpuitu, minister of state TJ Lalnuntluanga chuan, zu khapna danah winery ngaihnathiam a nih theihna atana hmalak a nih thu a sawi.

TJ Lalnuntluanga chuan, Tlangsam Winery chu theihtawp chhuaha tihhmasawn leh tum a nih thu sawiin, "Zu khapna dan siamah winery ngaihhnathiam a nih theihna turin hmalak a ni," a ti a; Champhai Grape Growers Society member-te chu neitu thinlung pu chunga hna thawk tur leh taimakna, rinawmna nen beidawng mai loa tih tak takna nena hma lam pan turin a fuih.

Winery tundin zelna tura hruaitu ṭhahnemngai tak takte leh Horticulture department-te hnathawhah lawmthu sawiin TJ Lalnuntluanga chuan, "Hmun nghet siama grape huan enkawl chuan thing leh mau chereu tur a ven tel avangin hetiang zawnga eizawnna kalpui chu nakin hun ngaihtuaha thil ṭha tak a ni," a ti.

Inkhawm hi CGGS chairman HS Vanlalfakzuala'n a kaihruai a, secretary C Zohmingliana'n an pawl hmalakna leh hmawchhawp an neih hrang hrangte a sawi. CGGS hi kum 2007-a din a ni a, member 148 an awm mek. Grape sâwrna hmun winery hi July 16, 2010-ah hman theih tura hawn a ni a, winery capacity chu quintal 2,000 a ni. Kum 2015 khan grape quintal 1,682 sâwrin, an sawr tam ber kum a ni a, nikum chhung khan quintal 729 an sâwr a ni.