July 8 aṭangin lirthei intlân chhâwk dan Ruahmanna thar hman ṭan a ni dawn
Coordination Committee on Traffic Management meeting thurel bawhzuiin Aizawl Traffic SP chuan, Aizawl khawpui chhung lirthei tâwt lutuk tihziaawm nan leh mipuite remchan zawk nan Aizawl khawpui (AMC area) chhungah July 8, 2019 aṭanga August 2, 2019 chhungin lirthei intlân chhâwkna tur ruahmanna thar hmanna tur thupek a chhuah.
Lirthei intlan chhâwk dan thara lirtheite tlan chhuah loh ni chu - Thawhṭanniah registration number 1 leh 2-a tawp te, Thawhlehniah registration 3 leh 4-a tawp te, Nilainiah registration 5 leh 6-a tawp te, Ninganiah registration 7 leh 8-a tawp te, Zirtawpniah registration 9 leh 0-a tawpte a ni.
Lirthei intlân chhâwk hian zing dar 9 aṭanga tlai dar 5:30 thleng a huam dawn a; Inrinni, Pathianni leh government holiday-te a huam lo ang. Lirthei intlân chhâwk dan thar hnuaiah hian taxi-te chu sticker A, B leh C an hman mek hmangin intlan chhâwk kalpui mek pangngai an la hmang dawn a, zing dar 9 aṭanga zan dar 6:30 inkarah an intlân chhâwk ang. Inrinni bikah chuan chawhnu dar 1 aṭangin an zavai tlân phal a ni dawn a, Pathianni leh sorkar chawlh ni dangahte pawh an tlan vek thei dawn a ni.
Intlân chhâwkin a huam lohte
1. Governor, Chief Minister leh Speaker-te (an carcade tiamin).
2. Public service vehicle (passenger phur chi lirthei) eg. - city bus, maxicab (state dang registered huamin), auto-rickshaw, institution bus, department bus, two wheeler taxi.
3. Police department motor duty, traffic police duty te, Fire & Emergency Services motor, Excise & Narcotics motor duty, Medical & Hospital emergency duty, ambulance/morgue van, executive magistrate law & order duty leh emergency duty, media mite (MJA sticker tárte chauh), PHE emergency duty leh PHE tui sem, P&E emergency duty, bawnghnute sem, chanchinbu sem, AMC hnuaia bawlhhlawh paih motor duty, army leh para-military force, government department/office despatch rider.
4. Rualbanlote tana special vehicle.
5. District dang aṭanga sorkar thil pawimawha duty te, law & order duty leh essential commodity duty-te chu Aizawl Traffic Police-te an hriattir hmasak hnuah an lirthei tlan dan tur ruahmansak theih a ni ang.
6. Lirthei 407 (truck) leh a chung lamte NH-54 Bawngkawn leh Zemabawk inkara tlan dan tura traffic police-te'n an lo ruahman tawh sa anga tlan tlang turte.