KHAWTHLIR

St. Xavier's College, Lengpui chuan nimin khan an college-ah, 'Discourse on Identity: Community, Culture and Politics' tih thupui hmangin national seminar an buatsaih a, bialtu MLA H Lalzirliana'n a hmanpui. Seminar hi vawiinah chhunzawm a ni ang.

Venghlui khawtlang chuan, July 2, 2019 zana an veng chhunga kut inthlakna a thleng chu an dem thu an tarlang. Venghlui Local Council kaihhruaia an venga tlawmngai pawl hrang hrangte nimin zinga ṭhukhawm chuan, "Ni 2.7.2019 (Thawhlehni) zana kan veng chhunga kut inthlakna thleng hi kan dem tak zet a, tun hnuah hetiang hi kan veng chhungah thleng tawh lo se kan ti. He thil thlenga sorkar thuneitute hmalakna hi kan thlâwp tlat a ni," an ti.

Mamit District Court leh Mamit District Legal Service Authority-te chuan International Day Against Drugs Abuse and Illicit Trafficking pualin July 3, Nilaini khan Mamit District Jail an tlawh a, jail-a chhiar tur lehkhabu ṭhahnem tak leh a ṭula hman turin pawisa an hlan. Jail tlawh puala inkhawm chu chief judicial magistrate Gracy L Bawihtlung-in a kaihruai a, judicial magistrate HT Lalmawizuala'n thu a sawi.

Champhai South bialtu MLA TJ Lalnuntluanga chuan July 3, Nilaini tlai khan Champhai Tlangsama aieng herna hmun, Tlangsam Turmeric Processing Centre a enfiah a, Horticulture department hotute'n an ṭawiawm. Centre hi December 18,  2014-ah hawn a ni a, khawl lam fel loh avangin kum 2016 aṭangin hman theih lohin a awm tawh a ni. 

Nimin khan Kolasib IPRO conference hall-ah MIRSAC buatsaihin khuarel chhiatna laka Kolasib dinhmun zirho a ni. Zirhonaah hian Kola-sib khawpui chhunga V/C, YMA, MUP leh MHIP aiawhte an tel a, khuarel chhiatna hrang hrang lirnghing, leimin leh thlipui lakah chhiatna thleng thei laka Kolasib dinhmun satellite aṭanga zir chianna thlirho a ni.