Robert Romawia'n sorkar laipui dawr
Minister of state Robert Romawia Royte chuan Nilaini leh nimin khan a department chana detailed project report (DPR) an siamte bawhzuiin New Delhi-ah sorkar laipui hotute a kâwm.
Sports & Youth Services Minister hian Nilaini zan khan Union Youth Affairs & Sports minister Kiren Rijiju chu a chenna inah a kâwm a; Mizoramin tun hnaia project paruk an thehluh tawh tihhlawhtlinna atana sum pe chhuak turin a ngen.
Robert Romawia hian nimin khan Union Sports secretary RS Julaniya chu a pisaah kâwmin, an project thehluh atana pawisa pe chhuak turin a ngen a; NEC sum hmanga siam tura ruahman Saitual leh Hnahthiala football khelmualte kum 2018 aṭanga tihtawp tak chu Ministry of Youth Affairs & Sports-in 'technical vetting' ti tharin tharthawh leh vat a ṭul thu a sawi.
Union Sports Secretary chuan, Mizoram tan football khelmual pahniha phûl lem phahna tur leh hockey khelmual pakhata phûl lem phahna tur sum pek chhuah chu ni 30 chhunga tihfel hman a inbeisei thu a hrilh. RS Julaniya leh Robert Romawia hian Olympic medal la pha tura training-na hmun ṭha leh coach ṭha rawih dan tur an sawi dun a, Robert Romawia chuan hemi atan hian DPR an siam tur thu a sawi.
Nimin vek khan Tourism Minister hian Union Tourism minister Prahlad Singh Patel chu Parliament House-a a pisaah kâwmin, Thenzawla Golf Course sak zawh thar chu hawng turin a sáwm a, Union Minister hian a thuphungin a pawm a ni.
Robert Romawia Royte hian, Ministry of DoNER secretary Inderjit Singh pawh kâwmin Reiek Tourism Project a sawipui a, DoNER Secretay hian cheng nuai 560 pe chhuak turin a thuphungin a pawm.